चिनियाँ प्रधानमन्त्री ली छ्याङद्वारा ठूला वस्तु वितरण केन्द्र निर्माणलाई तीव्रता दिन आग्रह

चच्याङ। चिनियाँ प्रधानमन्त्री ली छ्याङले विकास र सुरक्षा दुवै सुनिश्चित गर्न ठूला वस्तु तथा महत्त्वपूर्ण सामग्रीको वितरण केन्द्र निर्माणलाई तीव्रता दिन आग्रह गरेका छन्। चिनियाँ कम्युनिस्ट पार्टी केन्द्रीय समितिको राजनीतिक ब्युरो स्थायी समितिका सदस्यसमेत रहेका लीले मे २५ देखि २७ सम्म पूर्वी चीनको चच्याङ प्रान्तको चौशान र निङपोको भ्रमणका क्रममा यस्तो धारणा राखेका हुन्।

लीले ठूला वस्तु तथा महत्त्वपूर्ण सामग्रीको भण्डार नियमनमा राम्रो कार्य गर्ने, रणनीतिक सुनिश्चितता, बृहत् नियन्त्रण र आकस्मिक आवश्यकता पूर्तिका कार्यलाई सुदृढ गर्ने तथा औद्योगिक एवं आपूर्ति शृङ्खलाको लचकता सुधार गर्ने महत्त्वमा जोड दिए।

चौशानमा लीले पेट्रोलियम तथा खाद्यान्न भण्डारसम्बन्धी कार्यबारे अधिकारीहरूको प्रतिवेदन सुने, भण्डार सुविधाको निरीक्षण गरे र सम्बन्धित परियोजनाको निर्माण तथा सञ्चालनबारे जानकारी लिए। लीले ठूला वस्तु तथा महत्त्वपूर्ण सामग्रीको राम्रो भण्डार निर्माण गर्नु अर्थतन्त्र र समाजको स्थायित्वका लागि ठूलो महत्त्वको विषय भएको बताउँदै विभिन्न प्रकारका भण्डार सुविधाको निर्माणलाई अगाडि बढाउन र भण्डार क्षमता विस्तार गर्न आग्रह गरे। उनले भण्डार कार्य र व्यवस्थापनमा प्राविधिक नवप्रवर्तन गरी बौद्धिकताको स्तर अभिवृद्धि गर्न तथा रणनीतिक भण्डार र व्यावसायिक भण्डारको समन्वित सञ्चालनलाई प्रवर्द्धन गर्न प्रणाली र संयन्त्रको सुधारलाई गहिरो बनाउन पनि आग्रह गरे।

निङपोमा लीले चच्याङ प्रान्तको यातायात तथा रसद प्रणालीको निर्माण र योजनाको निरीक्षण गरेका थिए भने ठूला वस्तुको ढुवानी तथा प्रशोधनबारे जानकारी लिए। उनले बन्दरगाह पूर्वाधारको निर्माण सुदृढ गर्न, बहुढाँचागत यातायात विकास गर्न, समुद्री बन्दरगाह, स्थल बन्दरगाह, विमानस्थल र डिजिटल व्यापार बन्दरगाहको अन्तरसम्बन्ध प्रवर्द्धन गर्न, डिजिटल तथा बौद्धिक रूपान्तरण र स्तरोन्नतिलाई तीव्रता दिन तथा विशिष्ट मार्गमा विशिष्ट समयावधिमा मानवरहित एवं बौद्धिक ढङ्गले सामान ढुवानीको खोजी गर्न आग्रह गरे। साथै, समुद्री सेवालाई अनुकूलित गर्न, भन्सार क्षमता र सञ्चालन दक्षता सुधार गर्न, बन्दरगाहसम्बन्धी उद्योग विकास गर्न र औद्योगिक शृङ्खलालाई प्रवर्द्धन तथा सुदृढ गर्न पनि आवश्यक रहेको उनले बताए, जसले निङपो–चौशान बन्दरगाहलाई विश्वव्यापी रूपमा अग्रणी बन्दरगाहका रूपमा निर्माण गर्न सकिनेछ।