सात जना वैज्ञानिकलाई यस वर्षको ‘स प्राइज’ पुरस्कार घोषणा, प्रत्येक पुरस्कार राशी १२ लाख अमेरिकी डलर
हङकङ। सात जना वैज्ञानिकले यस वर्षको प्रतिष्ठित ‘स प्राइज’ पुरस्कार जितेका छन्। स प्राइज फाउन्डेसनले बुधबार पुरस्कारका तीन विधामा उत्कृष्ट कार्यका लागि उनीहरूलाई पुरस्कृत गरिने घोषणा गरेको हो।
खगोल विज्ञानतर्फको पुरस्कार टोकियो विश्वविद्यालयका एमेरिटस प्राध्यापक केनिची नोमोटो र क्यालिफोर्निया विश्वविद्यालय, सान्ता क्रुजका प्राध्यापक स्ट्यानफोर्ड वुस्लीलाई तारकीय विस्फोट र तत्त्वहरूको उत्पत्तिसम्बन्धी अध्ययनका लागि प्रदान गरिने भएको छ।
जीवन विज्ञान तथा चिकित्सातर्फको पुरस्कार इन्स्टिच्युट पास्चरका प्राध्यापक एन डेजेन, कोलेज द फ्रान्सका प्राध्यापक ह्युग्स द थे र सांघाई चियाओ थोङ विश्वविद्यालयका प्राध्यापक चु छन्लाई प्रदान गरिनेछ। फाउन्डेसनका अनुसार यी तीन वैज्ञानिकलाई तीव्र प्रोमाइलोसाइटिक ल्युकेमियाको आणविक र कोषीय आधारको खोज तथा सहक्रियात्मक लक्षित उपचारको अग्रगामी कार्यका लागि पुरस्कृत गरिनेछ।
गणितीय विज्ञानतर्फको पुरस्कार स्ट्यानफोर्ड विश्वविद्यालयका प्राध्यापक इमानुएल कान्डेस र प्रिन्सटनस्थित इन्स्टिच्युट फर एड्भान्स्ड स्टडीका प्राध्यापक कामिलो डे लेलिसलाई गणितीय विश्लेषणका गहन प्रविधिहरूको प्रयोग गरी व्यावहारिक समस्यालाई कठोरतापूर्वक बुझ्न गरेको महत्त्वपूर्ण योगदानका लागि प्रदान गरिनेछ।
स प्राइजअन्तर्गत सन् २००४ देखि हरेक वर्ष खगोल विज्ञान, जीवन विज्ञान तथा चिकित्सा, र गणितीय विज्ञान गरी तीन विधामा पुरस्कार प्रदान गरिँदै आएको छ भने सन् २०२७ देखि नयाँ कम्प्युटर विज्ञान पुरस्कार पनि प्रदान गरिनेछ। प्रत्येक पुरस्कारको राशी १२ लाख अमेरिकी डलर रहेको छ।
