चीन–कम्बोडिया सहकार्यलाई थप गहिरो बनाउने सहमति

न्युयोर्क । चिनियाँ विदेशमन्त्री वाङ यी र कम्बोडियाका उपप्रधानमन्त्री तथा विदेशमन्त्री प्राक सोखोनबीच चीन–कम्बोडिया सम्बन्धलाई थप अघि बढाउने विषयमा सहमति भएको छ।

बुधबार न्युयोर्कमा भएको भेटवार्तामा दुवै पक्षले उच्चस्तरीय आदानप्रदानलाई अझ घनिष्ठ बनाउने, व्यावहारिक सहकार्य विस्तार गर्ने र नयाँ युगमा साझा भविष्यसहितको चीन–कम्बोडिया समुदाय निर्माणलाई गति दिने प्रतिबद्धता जनाएका हुन्।

चिनियाँ कम्युनिस्ट पार्टी केन्द्रीय समितिको राजनीतिक ब्युरोका सदस्यसमेत रहेका विदेशमन्त्री वाङ यीले चीन–कम्बोडिया सम्बन्ध बलियो गतिमा अघि बढिरहेको बताए। उनले दुई देशका विदेश र रक्षा मन्त्री सहभागी हुँदै आएको “२+२” रणनीतिक संवाद संयन्त्रलाई सार्वजनिक सुरक्षा निकायसमेत सहभागी हुने “३+३” संयन्त्रमा स्तरोन्नति गर्नु दुई देशबीचको उच्चस्तरीय पारस्परिक विश्वासको प्रमाण भएको उल्लेख गरे।

वाङले यस कदमले चीन–कम्बोडिया सम्बन्धमा अझ व्यापक विकासको नयाँ आधार तयार गर्ने बताए। उनका अनुसार चीन कम्बोडियासँग व्यापक रणनीतिक सहकार्यलाई गहिरो बनाउन, उच्चस्तरीय आदानप्रदानलाई नजिक बनाउन, अर्थ–व्यापार, ऊर्जा, कानुन कार्यान्वयन तथा कनेक्टिभिटी क्षेत्रमा व्यावहारिक सहकार्य अघि बढाउन र बहुपक्षीय समन्वय सुदृढ गर्न तयार छ।

उनले यी प्रयासले नयाँ युगमा सर्वकालीन चीन–कम्बोडिया साझा भविष्य समुदाय निर्माणलाई थप अघि बढाउने विश्वास व्यक्त गरे।

भेटमा कम्बोडियाका उपप्रधानमन्त्री तथा विदेशमन्त्री सोखोनले कम्बोडिया एक–चीन सिद्धान्तप्रति दृढ रहेको बताए। उनले कम्बोडियाले चीनको पुनःएकीकरणलाई समर्थन गर्ने र कुनै पनि स्वरूपको “ताइवान स्वतन्त्रता” को विरोध गर्ने स्पष्ट पारे। यस विषयमा कम्बोडियाको अडान अटल रहेको उनको भनाइ थियो।

सोखोनले दुई देशका शीर्ष नेताहरूको रणनीतिक मार्गदर्शनमा कम्बोडिया चीनसँग मिलेर उच्चस्तरीय आदानप्रदानलाई थप सघन बनाउन, दुई देशका विकास रणनीतिबीच समन्वय तीव्र बनाउन र कम्बोडिया–चीन साझा भविष्य समुदाय निर्माणबाट थप ठोस उपलब्धि हासिल गर्न इच्छुक रहेको बताए।

भेटवार्तामा वाङ यी र सोखोनबीच कम्बोडिया–थाइल्यान्ड सीमा विवादबारे पनि विचार आदानप्रदान भएको थियो।

वाङले कम्बोडिया र थाइल्यान्डबीचको संवाद तथा परामर्शबाट सकारात्मक परिणाम निस्किएको बताए। दुवै देशको साझा मित्रका रूपमा चीनले संवादको बाटोमा अडिग रहने दुवै पक्षको प्रयासलाई समर्थन गर्ने उल्लेख गर्दै उनले आपसी विश्वास अभिवृद्धि र सम्बन्ध सुधारमा चीन सकारात्मक भूमिका खेल्न तयार रहेको बताए।

सोखोनले सीमा विवादबारे आफ्नो देशको अडान वाङलाई जानकारी गराउँदै कम्बोडिया–थाइल्यान्ड विवाद समाधानका लागि चीनले गरेको रचनात्मक प्रयासप्रति धन्यवाद व्यक्त गरे। उनले कम्बोडिया थाइल्यान्डसँग संवादमार्फत मतभेद घटाउन र द्विपक्षीय सम्बन्धलाई सामान्यीकरणतर्फ लैजान तयार रहेको बताए।

उनले यस प्रक्रियामा चीनको निरन्तर सहयोगको अपेक्षा गरेको पनि उल्लेख गरे।