उच्च पहाडी क्षेत्रमा आधुनिक मत्स्यपालन : ह्वाङनानले चिसो पानीको माछा उद्योगबाट ३९ करोड युआनको उत्पादन गर्यो

ह्वाङनान। छिङहाई प्रान्तको ह्वाङनान तिब्बती स्वायत्त प्रिफेक्चर उच्च हिमाली भूगोल र चिसो मौसमका लागि परिचित छ। यस क्षेत्रको जीवनरेखाका रूपमा रहेको ह्वाङ्हो नदी चिसो, स्वच्छ र प्रदूषणरहित पानीले भरिपूर्ण छ, जसले जलीय जीवनका लागि उत्कृष्ट वातावरण प्रदान गरेको छ।

पछिल्ला वर्षहरूमा ह्वाङनानले आफ्नो समृद्ध जलीय स्रोतको उपयोग गर्दै पठारी अवस्थासँग अनुकूल आधुनिक, पारिस्थितिकीय रूपमा दिगो मत्स्यपालन उद्योग निर्माण गरेको छ। चिसो पानीको माछा पालन व्यवसाय स्थिर रूपमा वृद्धि हुँदै यस क्षेत्रको सबैभन्दा द्रुत गतिमा बढिरहेको उद्योगमध्ये एक बनेको छ।

सन् २०२५ मा प्रिफेक्चरले ७८७ टन चिसो पानीको माछा उत्पादन गरेको थियो, जसले मत्स्यपालन उत्पादन मूल्यका रूपमा ३ करोड ९० लाख युआन (करिब ५७ लाख ३० हजार अमेरिकी डलर) आर्जन गरेको थियो।

नदीमा सिधै छाडिएका माछाका भुराहरू तीव्र धार र बदलिँदो अवसादसँग जुध्न नसक्ने भएकाले स्थानीय किसानहरूले दुई चरणको मोडेल विकास गरेका छन्। यसअन्तर्गत माछाका भुराहरूलाई पहिले स्थल–आधारित सुविधामा करिब ०.५ किलोग्राम तौल नपुग्दासम्म हुर्काइन्छ। एकपटक ती पर्याप्त बलिया भएपछि नदीमा राखिएका पारिस्थितिकीय जाली पिँजडाहरूमा स्थानान्तरण गरिन्छ। यस विधिले प्रजनन चक्र छोटो बनाउनुका साथै बाँच्ने दरमा सुधार र आर्थिक प्रतिफलमा वृद्धि गरेको छ।