रुस र कजाकिस्तानका राष्ट्रपतिद्वारा मित्रता र असल छिमेकीपनका सात स्तम्भसम्बन्धी संयुक्त वक्तव्य जारी

अस्ताना। रुसी राष्ट्रपति भ्लादिमिर पुटिन र कजाकिस्तानका राष्ट्रपति कासिम–जोमार्त तोकायेभले दुई देशका जनताबीच मित्रता र असल छिमेकीपनका सात स्तम्भसम्बन्धी संयुक्त वक्तव्य जारी गरेका छन्। मे २८ मा अस्तानामा जारी उक्त वक्तव्यमा आज विश्व गहिरो र द्रुत परिवर्तनबाट गुज्रिरहेको, अन्तर्राष्ट्रिय सम्बन्धको प्रणाली गम्भीर चुनौती र खतराको सामना गरिरहेको, विश्वव्यापी अस्थिरता र विश्वासको सङ्कट गहिरिँदै गएको र सुरक्षा तथा दिगो विकास सुनिश्चित गर्ने परम्परागत दृष्टिकोणको पुनर्मूल्याङ्कन भइरहेको उल्लेख गरिएको छ।

रुस र कजाकिस्तानले दिगो विकासका लागि अवसर खोल्ने र अन्तर्राष्ट्रिय परिस्थितिलाई स्थिरता तथा मौलिक पुनरुत्थानको मार्गतर्फ डोर्याउन सक्षम अझ न्यायपूर्ण विश्व व्यवस्थाको निर्माणको कुनै विकल्प नरहेकोमा विश्वस्त रहेको वक्तव्यमा उल्लेख छ। यस्तो अवधिमा पारस्परिक सम्मान, असल छिमेकीपन, राष्ट्रिय हितको ख्याल र समान साझेदारीमा आधारित अन्तरराज्य अन्तरक्रियाका बलिया र समयपरीक्षित सिद्धान्तहरूले विशेष मूल्य प्राप्त गर्ने वक्तव्यमा जनाइएको छ।

दुई देशबीचको सम्बन्ध यिनै दृष्टिकोणमा आधारित रहेको र यसले घनिष्ठ ऐतिहासिक सम्बन्ध, पारस्परिक समर्थन र पारस्परिक लाभकारी सहकार्यलाई आत्मसात गरेको उल्लेख गर्दै वक्तव्यमा रुस र कजाकिस्तानका जनताबीच मित्रता र असल छिमेकीपनका निम्न सात स्तम्भलाई सुदृढ गर्न प्रयास गरिने जनाइएको छ।

पहिलो स्तम्भ—साझा इतिहास र मित्रता तथा असल छिमेकीपनको भावनामा यसको वस्तुनिष्ठ व्याख्याप्रति उत्तरदायी दृष्टिकोण। दोस्रो स्तम्भ—युरेसियाली एकीकरण विकास गर्न र सहकार्य, सुरक्षा तथा संवादको क्षेत्रीय अवकाश निर्माण गर्न संयुक्त प्रयास। तेस्रो स्तम्भ—असल छिमेकीपन र सहकार्यको अवकाशका रूपमा साझा सीमा। चौथो स्तम्भ—आर्थिक साझेदारी। पाँचौं स्तम्भ—साझा सम्पदा, परम्परागत मूल्य र सभ्यतागत निकटताका रूपमा भाषिक तथा सांस्कृतिक विविधता। छैटौं स्तम्भ—युवा सहकार्य, शैक्षिक आदानप्रदान र खेलकुदमा सहकार्य। सातौं स्तम्भ—भविष्यप्रतिको साझा दृष्टिकोण।

वक्तव्यमा रुस–कजाकिस्तान सम्बन्धको भविष्यलाई दिगो र पारस्परिक लाभकारी विकासको अवकाशका रूपमा हेरिएको छ, जहाँ दुई देश समान साझेदार, रणनीतिक मित्र र असल छिमेकीका रूपमा कार्य गर्दछन्। यी सात स्तम्भलाई निरन्तर सुदृढ गर्दै दुई देशले विश्वास र स्थिरतालाई बलियो बनाइरहेको र जनताका लागि योग्य भविष्यको अवसर विस्तार गरिरहेको वक्तव्यमा उल्लेख छ। साझा इतिहास र सिर्जनाप्रतिको साझा प्रतिबद्धतामा आधारित रुस र कजाकिस्तानको मित्रता र असल छिमेकीपन दीर्घ ऐतिहासिक परिप्रेक्ष्यका लागि दुई देशबीचको सम्बन्धको भरपर्दो जग बनिरहनेमा दुवै पक्ष विश्वस्त रहेको वक्तव्यमा जनाइएको छ।