क्यानडा–युक्रेन ड्रोन सम्झौताप्रति रुसको आपत्ति
काठमाडौं । रुसले क्यानडाले युक्रेनसँग मानवविहीन हवाई प्रणाली अर्थात् ड्रोन उत्पादनसम्बन्धी गरेको सम्झौताप्रति कडा आपत्ति जनाएको छ।
क्यानडाका लागि रुसी राजदूत ओलेग स्तेपानोभले मार्च २९ मा आइटार–टास समाचार एजेन्सीलाई दिएको टिप्पणीमा उक्त सम्झौतालाई क्यानडाले रुसविरुद्ध अघि बढाइरहेको शत्रुतापूर्ण नीतिको निरन्तरता भएको बताएका छन्।
राजदूत स्तेपानोभका अनुसार क्यानडाको ओटावाले सार्वजनिक रूपमा घोषणा गरेको ड्रोन उत्पादनसम्बन्धी सम्झौता युक्रेनी पक्षलाई सैन्य सहयोग विस्तार गर्ने कदम हो। उनले यसलाई युक्रेन संकटमा क्यानडाको संलग्नता नयाँ तहमा पुगेको संकेतका रूपमा व्याख्या गरेका छन्।
उनले क्यानडाले यसअघि हतियार र आर्थिक सहायता उपलब्ध गराउँदै आएकोमा अब सैन्य–औद्योगिक उत्पादनको क्षेत्रमा प्रत्यक्ष सहकार्यतर्फ अघि बढेको आरोप लगाए। रुसी राजदूतले यस्तो कदमले द्वन्द्वलाई थप लम्ब्याउने र त्यसबाट लाभ लिन खोज्ने प्रवृत्ति देखिएको दाबी गरेका छन्।
रुसले क्यानडा–युक्रेन ड्रोन उत्पादन सम्झौतालाई आफ्नो सैन्य तथा राजनीतिक योजनामा ध्यानमा राख्ने पनि जनाएको छ। राजदूत स्तेपानोभले ओटावाको पछिल्लो निर्णयलाई रुसविरुद्धको नीति थप तीव्र बनाउने कदमका रूपमा चित्रण गरेका छन्।
क्यानडाले युक्रेनका लागि ड्रोन उत्पादनसम्बन्धी सम्झौता घोषणा गरेपछि रुसले यस विषयमा औपचारिक रूपमा असन्तुष्टि व्यक्त गरेको हो। पछिल्लो टिप्पणीले युक्रेन युद्धलाई लिएर रुस र पश्चिमी मुलुकहरूबीचको तनाव थप गहिरिँदै गएको देखाएको छ।
