नेपाल र भारतबीचको रक्षा साझेदारी थप सुदृढ : बहुराष्ट्रिय सैन्य अभ्यास ‘एक्स प्रगति’ सम्पन्न

काठमाडौँ । नेपाल र भारतबीचको दिगो रक्षा साझेदारीलाई थप सुदृढ बनाउँदै नेपाली सेनाको ३८ सदस्यीय टोलीले भारतीय सेनाद्वारा आयोजित पहिलो बहुराष्ट्रिय छिमेकी सैन्य मैदानी प्रशिक्षण अभ्यास ‘एक्स प्रगति’ मा सहभागिता जनाएको छ। उक्त अभ्यास सन् २०२६ को मे १८ देखि ३१ सम्म भारतको मेघालयस्थित उमरोईको फरेन ट्रेनिङ नोड (एफटीएन) मा सञ्चालन भएको थियो।

भारतीय सेनाले आयोजना गरेको यस अभ्यासमा नेपालसहित एघार मित्रराष्ट्रका सेनाहरूको सहभागिता रहेको थियो। अभ्यासको मुख्य उद्देश्य सहभागी राष्ट्रहरूबीच सञ्चालनगत तालमेल अभिवृद्धि गर्ने, आपसी विश्वास सुदृढ गर्ने र सामूहिक क्षमता विकास गर्ने रहेको थियो।

नेपाली सेनाका उपप्रधानसेनापति लेफ्टिनेन्ट जनरल प्रदीपजंग केसीको नेतृत्वमा तीन सदस्यीय पर्यवेक्षक टोलीले मे २८ देखि ३१ सम्म उमरोईमा आयोजित अभ्यासको प्रमाणीकरण चरण र समापन समारोहमा उपस्थिति जनाएको थियो। उक्त सहभागिताले दुई देशका सेनाबीचको उच्चस्तरीय सैन्य सम्बन्धलाई थप प्रगाढ बनाएको छ।

भारतीय सेनाका अनुसार यस अभ्यासले सहभागी मित्रराष्ट्रहरूबीचको सैन्यदेखि सैन्य सम्बन्धलाई सुदृढ बनाउनुका साथै उनीहरूबीचको सञ्चालनगत सामञ्जस्य, पारस्परिक विश्वास र सामूहिक क्षमता अभिवृद्धिमा महत्त्वपूर्ण योगदान पुर्याएको छ। बहुराष्ट्रिय स्वरूपको यस अभ्यासले क्षेत्रीय सुरक्षा सहकार्यको भावनालाई समेत बल पुर्याएको विश्वास गरिएको छ।

‘एक्स प्रगति’ अभ्यास भारतीय सेनाको पहलमा सुरु गरिएको नयाँ बहुराष्ट्रिय सैन्य अभ्यास हो, जसले छिमेकी तथा मित्रराष्ट्रहरूबीच साझा सुरक्षा चुनौतीहरूको सामना गर्न सहकार्यको संस्कृति विकास गर्ने लक्ष्य राखेको छ। नेपाली सेनाको सक्रिय सहभागिताले नेपाल र भारतबीचको सैन्य कूटनीतिको बढ्दो आयामलाई पुष्टि गरेको छ।