प्रधानमन्त्रीको अभिव्यक्ति गम्भीर राष्ट्रघात भएको नेकपाको ठहर, तत्काल सच्याउन माग
काठमाडौं । नेपाली कम्युनिस्ट पार्टी (नेकपा) ले प्रतिनिधिसभामा प्रधानमन्त्री वालेन्द्र शाहले नेपाल–भारत सीमा सम्बन्धमा व्यक्त गरेको धारणा गैरजिम्मेवारपूर्ण, राष्ट्रिय सार्वभौमसत्ता र भौगोलिक अखण्डताको प्रतिकूल तथा स्थापित ऐतिहासिक तथ्यविपरीत रहेको भन्दै निन्दा गरेको छ।
आइतबार पार्टीका प्रवक्ता प्रकाश ज्वालाले प्रेस विज्ञप्ति जारी गर्दै अन्तर्राष्ट्रिय सीमा अतिक्रमण र सीमावर्ती क्षेत्रमा हुने जग्गाको भोगचलन (क्रस–होल्डिङ) दुई फरक विषय भएको उल्लेख गरेका छन्। ‘भारतले नेपालको कालापानी, लिपुलेक, लिम्पियाधुरा लगायतका क्षेत्रमा एकतर्फी रूपमा गर्दै आएको अतिक्रमणको ऐतिहासिक तथ्यलाई तोडमोड गरी नेपालले समेत भारतको जमिन कब्जा गरेको भन्नु गम्भीर राष्ट्रघात हो,’ विज्ञप्तिमा भनिएको छ।
पार्टीले सुगौली सन्धि तथा प्राचीन सीमा स्तम्भका आधारमा निर्धारण भएको सीमारेखाका कारण सीमावर्ती नागरिकको जग्गा दुवैतर्फ पर्नुलाई कब्जा भन्न नमिल्ने तर्क गरेको छ। संसदको रोस्ट्रमबाट नेपालले भारतको जमिन कब्जा गरेको भनी दिइएको अभिव्यक्ति संविधानको मर्मविपरीत रहेको पनि नेकपाको दाबी छ।
विज्ञप्तिमा नेपाल र भारतबीच सीमा विवाद रहेको र त्यसलाई कूटनीतिक माध्यमबाट समाधान गर्नुपर्नेमा पार्टी स्पष्ट रहेको उल्लेख गर्दै ‘हालसम्म नेपालले भारतको कुनै पनि भूभाग कब्जा गरेको छैन भन्ने तथ्यमा टेकेर मात्रै हाम्रो दाबी कायम रहन्छ’ भनिएको छ।
नेकपाले प्रधानमन्त्रीको उक्त भनाइ तत्काल सच्याउन, संसद्को अभिलेखबाट हटाउन तथा राष्ट्रिय हितका विषयमा राष्ट्रिय सहमति कायम गरी तथ्यका आधारमा भारतसँग कूटनीतिक संवाद अघि बढाउन सरकारसँग माग गरेको छ।
