सोभियत सैनिकको समाधि भत्काउने योजनामा रुसको विरोध
काठमाडौं । रुसले लिथुआनियाको भेभिसस्थित सोभियत सैनिक तथा अधिकृतहरूको समाधिस्थल भत्काउने योजनाप्रति कडा आपत्ति जनाएको छ।
रुसी विदेश मन्त्रालयका अनुसार जुन १ मा लिथुआनियाकी कार्यवाहक राजदूत जोलान्ता तुबाइतेलाई मन्त्रालयमा बोलाई लिथुआनियाली अधिकारीहरूको पछिल्लो योजनाप्रति कडा विरोध जनाइएको हो। रुसले नाजीहरूबाट लिथुआनियालाई मुक्त गराउने क्रममा लडाइँमा ज्यान गुमाएका सोभियत सैनिक तथा अधिकृतहरूको समाधिस्थल हटाउने योजना अस्वीकार्य रहेको बताएको छ।
रुसी पक्षले यसअघि अप्रिल ३० मा लिथुआनियाको सियाउलियाई सहरको मध्यभागमा रहेको यस्तै समाधिस्थलमाथि गरिएको कारबाहीबारे पनि विरोध जनाएको स्मरण गराएको छ। त्यसका बाबजुद लिथुआनियामा युद्धमा ज्यान गुमाएका सैनिकहरूको अवशेष र स्मृतिस्थल अपमानित गर्ने अभियान झन् तीव्र हुँदै गएको रुसको भनाइ छ।
रुसी विदेश मन्त्रालयले सैन्य समाधिस्थलको विनाश, क्षति वा अपमान गम्भीर विषय भएको जनाएको छ। मन्त्रालयका अनुसार विदेशमा रहेका सैन्य समाधिस्थलसमेत नष्ट गर्ने, बिगार्ने वा अपमान गर्ने कार्य रुसी महासङ्घको कानुनअनुसार आपराधिक कसुर मानिन्छ।
रुसले यस्ता गतिविधिमा व्यक्तिगत रूपमा जिम्मेवार व्यक्तिहरूको पहिचान मस्कोमा स्पष्ट रूपमा रहेको जनाएको छ। मन्त्रालयले इतिहास, युद्धमा ज्यान गुमाएका सैनिकहरूको स्मृति र अन्तर्राष्ट्रिय नैतिक दायित्वप्रति सम्मान गर्न लिथुआनियालाई आग्रह गरेको छ।
दोस्रो विश्वयुद्धका क्रममा नाजी जर्मनीविरुद्ध लडेका सोभियत सैनिकहरूको स्मृतिस्थल पूर्वी युरोपका विभिन्न देशमा रहेका छन्। तर पछिल्ला वर्षहरूमा केही बाल्टिक तथा पूर्वी युरोपेली देशहरूमा यस्ता स्मारक र समाधिस्थल हटाउने वा स्थानान्तरण गर्ने विषयमा विवाद बढ्दै आएको छ।
रुसले यस्ता कदमलाई इतिहासको अपमान र फासिवादविरुद्ध लडेर ज्यान गुमाएका सैनिकहरूको स्मृतिमाथिको आक्रमणका रूपमा व्याख्या गर्दै आएको छ।
