दुनह्वाङमा विश्व चिनियाँ अध्ययन सम्मेलन सुरु
बेइजिङ । प्राचीन रेशम मार्गको महत्वपूर्ण केन्द्र मानिने चीनको उत्तर–पश्चिमी गान्सु प्रान्तस्थित दुनह्वाङमा बुधबार तेस्रो विश्व चिनियाँ अध्ययन सम्मेलन सुरु भएको छ। सम्मेलनमा विश्वभरका विद्वान्, संस्कृतिविद् र चिनियाँ अध्ययनका अध्येताहरूले बढ्दो अनिश्चितताबीच साझा विश्वव्यापी चुनौती सामना गर्न चिनियाँ सभ्यताले दिन सक्ने योगदानबारे छलफल गरेका छन्।
“सभ्यताहरूको ज्ञान एकत्रित गर्दै हाम्रो समयका चुनौतीहरू संयुक्त रूपमा सामना गर्ने” मूल नारासहित आयोजित सम्मेलनमा करिब ७० देशका ३०० भन्दा बढी प्रतिनिधि सहभागी छन्।
उद्घाटन समारोहमा इथियोपियाका पूर्वराष्ट्रपति तथा चिनियाँ अध्ययनविद् मुलातु टेशोमे विर्तुले चिनियाँ अध्ययनको उत्पत्ति चीनमा भए पनि यो विश्वको साझा बौद्धिक सम्पदा भएको बताए। उनले चिनियाँ अध्ययनलाई सम्पूर्ण मानवजातिको साझा ज्ञान निधिका रूपमा व्याख्या गरे।
इटालीको का फोस्कारी विश्वविद्यालय भेनिसकी रेक्टर टिजियाना लिप्पिएल्लोले सम्मेलनले पारस्परिक विश्वास, साझा मानव मर्यादा, सहानुभूति र दिगो शान्तिमा आधारित विश्व निर्माणतर्फ नयाँ र दीर्घकालीन पुल निर्माणमा योगदान गर्ने बताइन्। उनका अनुसार इतिहास, संस्कृति र कल्पनाशक्ति शताब्दीयौँ पार गर्दै दुनह्वाङमा भेटिन्छन्, त्यसैले वर्तमान समयको संवादका लागि यो स्थान विशेष अर्थपूर्ण छ।
सम्मेलनका क्रममा चारवटा उपमञ्च आयोजना गरिने कार्यक्रम छ। ती उपमञ्चमा चिनियाँ आधुनिकीकरणको विश्वव्यापी महत्व, चिनियाँ सभ्यताभित्र निहित शान्तिमुखी मूल्य, चिनियाँ अध्ययनको ऐतिहासिक विकास र अन्तरसांस्कृतिक आदानप्रदान, तथा परम्परागत चिनियाँ दर्शनको समकालीन सान्दर्भिकताबारे छलफल हुने जनाइएको छ।
दुनह्वाङलाई सम्मेलनस्थलका रूपमा छनोट गर्नु आफैँमा सांस्कृतिक र ऐतिहासिक दृष्टिले अर्थपूर्ण मानिएको छ। दुई हजार वर्षभन्दा पहिले यो शहर प्राचीन रेशम मार्गको महत्वपूर्ण चौबाटो थियो। यही मार्ग हुँदै चिनियाँ रेशम र चिया पश्चिमतर्फ पुगेका थिए भने अंगुर, गाजर र अनारजस्ता उत्पादन चीनमा भित्रिएका थिए।
आज पनि दुनह्वाङ चीनको प्रमुख सांस्कृतिक धरोहरस्थलका रूपमा परिचित छ। यहाँ युनेस्को विश्व सम्पदा सूचीमा सूचीकृत तीनवटा स्थल छन् भने २६० भन्दा बढी दर्ता भएका सांस्कृतिक सम्पदा स्थल रहेका छन्।
सम्मेलनले चिनियाँ सभ्यता, विश्वव्यापी संवाद, सांस्कृतिक आदानप्रदान र साझा भविष्यको निर्माणबारे अन्तर्राष्ट्रिय विमर्शलाई थप गहिरो बनाउने अपेक्षा गरिएको छ।
