ताइवान भ्रमण गरेका न्युजिल्याण्डका सांसदमाथि चीनको प्रवेश प्रतिबन्ध
चिनियाँ विदेश मन्त्रालयकी प्रवक्ता माओ निङले ताइवान भ्रमण गरेका न्युजिल्याण्डका निश्चित सांसदहरूमाथि प्रवेश प्रतिबन्ध लगाइएको पुष्टि गरेकी छन्। उक्त भ्रमण एक चीन सिद्धान्तको उल्लङ्घन रहेको उनले बताइन्।
दैनिक पत्रकार सम्मेलनमा माओले ताइवान प्रश्नमा रेखा नाघ्ने जो कोहीले पनि त्यसको मूल्य चुकाउनुपर्ने बताइन्। उनका अनुसार न्युजिल्याण्डका केही सांसदहरूले चिनियाँ पक्षको गम्भीर चासो र दृढ विरोधको वेवास्ता गर्दै ताइवान भ्रमण गरेका थिए।
यस कार्यले एक चीन सिद्धान्तको उल्लङ्घन गर्नुका साथै चीनको आन्तरिक मामिलामा हस्तक्षेप पनि भएको माओको भनाइ छ। चीनको सान्दर्भिक कानुनअनुसार चिनियाँ पक्षले प्रवेश प्रतिबन्ध लगायतका उपायहरू लिने निर्णय गरेको उनले जानकारी दिइन्।
माओले एक चीन सिद्धान्त अन्तर्राष्ट्रिय सहमति र अन्तर्राष्ट्रिय सम्बन्धको आधारभूत मानदण्ड भएको र यो चीन–न्युजिल्याण्ड सम्बन्धको राजनीतिक आधार समेत रहेको बताइन्। उनले सम्बन्धित व्यक्तिहरूले चीनको सार्वभौमिकता र क्षेत्रीय अखण्डताको सम्मान गर्न तथा एक चीन सिद्धान्तको पालना गर्न आग्रह गरिन्।
