नेपाललाई निर्बाध इन्धन आपूर्ति गर्ने भारतको प्रतिबद्धता
नयाँ दिल्ली । भारतले पश्चिम एसिया तथा मध्यपूर्वमा जारी तनावका बाबजुद नेपाललाई पेट्रोलियम पदार्थको आपूर्ति निर्बाध रूपमा सुनिश्चित गरिएको जनाएको छ।
भारतीय विदेशमन्त्री एस जयशंकरले शनिबार नयाँ दिल्लीमा नेपालसँगको सम्बन्ध र आपसी सहयोगबारे बोल्दै यस्तो प्रतिबद्धता व्यक्त गरेका हुन्। उनले नेपाल र भारत आवश्यकताका समयमा सधैँ एकअर्काको साथमा उभिँदै आएको उल्लेख गरे।
जयशंकरले पश्चिम एसिया र मध्यपूर्वमा जारी संकटको सन्दर्भमा भारतले नेपाललाई इन्धन आपूर्ति अवरुद्ध हुन नदिन आवश्यक व्यवस्था गरेको बताए। उनका अनुसार कठिन परिस्थितिमा पनि नेपाललाई पेट्रोलियम पदार्थ उपलब्ध गराउने भारतको प्रतिबद्धता कायम रहनेछ।
उनले नेपाल–भारत सम्बन्ध केवल भौगोलिक निकटतामा सीमित नभई ऐतिहासिक, सामाजिक, सांस्कृतिक र व्यावहारिक आवश्यकतासँग जोडिएको बताए। दुवै देशबीचको सहकार्य आपसी विश्वास, आवश्यकताका बेला सहयोग र क्षेत्रीय स्थिरताको आधारमा अघि बढ्नुपर्ने उनको भनाइ थियो।
नेपाल पेट्रोलियम पदार्थका लागि ठूलो रूपमा भारतसँग निर्भर छ। नेपाल आयल निगमले भारतीय आयल कर्पोरेसनमार्फत पेट्रोल, डिजेल, हवाई इन्धन र खाना पकाउने ग्यास आयात गर्दै आएको छ। विश्व ऊर्जा बजारमा देखिने अस्थिरता र मध्यपूर्वमा हुने तनावले नेपालजस्ता आयातमा निर्भर मुलुकलाई प्रत्यक्ष असर पार्न सक्ने भएकाले आपूर्ति सुनिश्चितताको विषय महत्वपूर्ण मानिन्छ।
भारतको पछिल्लो प्रतिबद्धतालाई ऊर्जा सुरक्षाका दृष्टिले नेपालका लागि सकारात्मक सन्देशका रूपमा हेरिएको छ। विशेषगरी अन्तर्राष्ट्रिय बजारमा इन्धन आपूर्ति र मूल्यमा अनिश्चितता बढिरहेका बेला छिमेकी मुलुकबाट आएको यस्तो आश्वासनले आपूर्ति व्यवस्थापन र उपभोक्ता तहमा सम्भावित दबाब कम गर्न सहयोग पुग्ने अपेक्षा गरिएको छ।
जयशंकरको भनाइले नेपाल–भारतबीच ऊर्जा आपूर्ति, आपत्कालीन सहयोग र आर्थिक सम्बन्धलाई थप व्यावहारिक रूपमा अघि बढाउने संकेत गरेको छ।
