होडेदाहमा बम विस्फोट हुँदा यमनका वरिष्ठ सैन्य कमाण्डरको मृत्यु

साना । यमनको लाल सागर तटीय प्रान्त होडेदाहमा सडक छेउमा राखिएको बम विस्फोट हुँदा सरकारसमर्थक नेसनल रेसिस्टेन्स फोर्सका एक वरिष्ठ कमाण्डरको मृत्यु भएको छ।

नेसनल रेसिस्टेन्स फोर्सले शनिबार जारी गरेको वक्तव्यअनुसार फोर्सको फर्स्ट डिभिजनका कमाण्डर याह्या वाहिशको होडेदाहको दक्षिणी क्षेत्रमा पर्ने अल खौखाह जिल्लामा भएको विस्फोटमा मृत्यु भएको हो। उनको काफिला उक्त क्षेत्रमा गुज्रिरहेका बेला विस्फोटक पदार्थ पड्किएको जनाइएको छ।

वक्तव्यअनुसार विस्फोटमा वाहिशसँगै रहेका एक सुरक्षाकर्मीको पनि मृत्यु भएको छ। घटनामा अन्य दुई सुरक्षाकर्मी घाइते भएका छन्।

नेसनल रेसिस्टेन्स फोर्सले उक्त बम हुथीहरूले राखेको आरोप लगाएको छ। यद्यपि, घटनाबारे हुथी पक्षबाट तत्काल कुनै प्रतिक्रिया आएको छैन। विस्फोटको जिम्मेवारी पनि कुनै समूहले लिएको छैन।

नेसनल रेसिस्टेन्स फोर्स यमनको राष्ट्रपति नेतृत्व परिषद्का सदस्य तारिक सालेहको नेतृत्वमा रहेको छ। तारिक सालेह दिवंगत राष्ट्रपति अली अब्दुल्लाह सालेहका भतिजा हुन्। साउदी नेतृत्वको गठबन्धनको समर्थनमा गठन भएको यो फोर्स बाब अल–मन्देब जलडमरूमध्य नजिकैको रणनीतिक तटीय सहर मोखामा मुख्यालय राखेर सक्रिय छ।

यमन सन् २०१४ को अन्त्यदेखि द्वन्द्वमा फसेको छ। त्यसबेला हुथीहरूले राजधानी सानामाथि नियन्त्रण कायम गरेपछि सन् २०१५ मा साउदी नेतृत्वको गठबन्धनले अन्तर्राष्ट्रिय मान्यताप्राप्त सरकारको समर्थनमा सैन्य हस्तक्षेप गरेको थियो।

संयुक्त राष्ट्रसङ्घको मध्यस्थतामा यमनी सरकार र हुथीहरूबीच अप्रिल २०२२ मा युद्धविराम भएको थियो। उक्त औपचारिक युद्धविराम छ महिनापछि समाप्त भए पनि त्यसयता दुवै पक्षले ठूलो स्तरको भिडन्तबाट टाढा रहँदै व्यवहारिक रूपमा युद्धविरामको अवस्था कायम राख्दै आएका छन्।

लामो समयदेखि जारी द्वन्द्वका कारण यमन विश्वकै गम्भीर मानवीय संकटमध्ये एकबाट गुज्रिरहेको छ। लाखौँ मानिस खाद्य असुरक्षा, स्वास्थ्य सेवा अभाव, विस्थापन र आधारभूत सेवाको कमीबाट प्रभावित छन्।

होडेदाहमा भएको पछिल्लो विस्फोटले यमनमा औपचारिक युद्धविराम नवीकरण नभए पनि सुरक्षा जोखिम अझै कायम रहेको संकेत गरेको छ।