राष्ट्रसंघ महासचिव निष्पक्ष हुनुपर्ने लाभरोभको जोड
मस्को । रुसी विदेशमन्त्री सर्गेई लाभरोभले संयुक्त राष्ट्रसंघका महासचिव निष्पक्ष, स्वतन्त्र र राष्ट्रसंघीय बडापत्रप्रति पूर्ण प्रतिबद्ध हुनुपर्ने बताएका छन्।
मस्कोमा जुन ८ मा संयुक्त राष्ट्रसंघ महासचिवका उम्मेदवार मिशेल बाचेलेटसँग भएको वार्ताको सुरुआती मन्तव्यमा लाभरोभले राष्ट्रसंघको नेतृत्व दोहोरो मापदण्डबाट मुक्त हुनुपर्ने धारणा राखेका हुन्।
लाभरोभले राष्ट्रसंघ महासचिवले राष्ट्रसंघीय बडापत्रको सम्पूर्ण भावना र सिद्धान्तप्रति प्रतिबद्ध भएर काम गर्नुपर्ने उल्लेख गरे। उनका अनुसार महासचिव कुनै एक पक्ष, शक्ति वा राजनीतिक व्याख्याको प्रतिनिधि नभई सम्पूर्ण अन्तर्राष्ट्रिय समुदायप्रति उत्तरदायी हुनुपर्छ।
उनले अन्तर्राष्ट्रिय मामिलामा समान प्रकृतिका विषयलाई फरक–फरक मापदण्डबाट व्याख्या गरिने प्रवृत्तिप्रति असन्तुष्टि व्यक्त गरे। उदाहरणका रूपमा लाभरोभले कोसोभोको विषयलाई ‘आत्मनिर्णयको अधिकार’का रूपमा प्रस्तुत गरिएको तर क्रिमियाको विषयलाई मुख्य रूपमा ‘युक्रेनको क्षेत्रीय अखण्डता’का आधारमा मूल्यांकन गरिएको बताए।
लाभरोभले यस्तो भिन्न व्यवहारलाई अन्तर्राष्ट्रिय सम्बन्धमा गम्भीर विषय भएको उल्लेख गर्दै आगामी राष्ट्रसंघ महासचिव वास्तवमै भिन्न, निष्पक्ष र सिद्धान्तनिष्ठ हुनुपर्नेमा जोड दिए।
उनले बाचेलेटको प्रस्तुति सुन्न आफू इच्छुक रहेको बताउँदै राष्ट्रसंघको आगामी नेतृत्वबाट निष्पक्षता, स्वतन्त्रता र बडापत्रप्रतिको वास्तविक प्रतिबद्धता अपेक्षित रहेको धारणा राखे।
वार्तामा लाभरोभले संयुक्त राष्ट्रसंघको विश्वसनीयता र प्रभावकारिता जोगाउन नेतृत्व तहमा दोहोरो मापदण्डरहित दृष्टिकोण आवश्यक रहेको सन्देश दिएका छन्।
