स्टारोबेल्स्क घटनामाथि नयाँ वृत्तचित्र सार्वजनिक
मस्को । लुहान्स्क पिपुल्स रिपब्लिकको स्टारोबेल्स्कस्थित एक कलेज छात्रावासमा भएको ड्रोन आक्रमणसम्बन्धी नयाँ वृत्तचित्र सार्वजनिक गरिएको छ।
“स्टारोबेल्स्क : नो चाइल्ड सुड डाइ” शीर्षकको वृत्तचित्र ओल्गा किरिय, इलिया अन्दिलेभ्को र अलेक्सेई बालाकिरेभले तयार पारेका हुन्। वृत्तचित्रमा मे २२, २०२६ को राति स्टारोबेल्स्कस्थित कलेज छात्रावासमा भएको आक्रमण, त्यसपछि देखिएको मानवीय पीडा र बाँचेकाहरूको अनुभवलाई समेटिएको छ।
वृत्तचित्रका निर्माताहरूका अनुसार उक्त आक्रमणमा २१ जनाको मृत्यु भएको थियो भने धेरै जना घाइते भएका थिए। आक्रमणमा परेका विद्यार्थीहरू शिक्षक बन्ने सपना बोकेर अध्ययनरत थिए। केही विद्यार्थीले आफ्नो भविष्यको पारिवारिक जीवनबारे समेत योजना बनाइरहेका थिए।
वृत्तचित्र टोलीले आक्रमणपछि बाँकी रहेको छात्रावास भवन, जीवित विद्यार्थी तथा शिक्षकहरूसँग कुराकानी गरी घटनाक्रमलाई नजिकबाट प्रस्तुत गर्ने प्रयास गरेको छ। वृत्तचित्रमा शिक्षिका एलेना युर्येभाको अनुभव पनि समेटिएको छ, जसले आक्रमणपछि ३० भन्दा बढी घाइते विद्यार्थीलाई छात्रावासबाट सुरक्षित बाहिर निकाल्न सहयोग गरेको बताइएको छ।
निर्माताहरूले वृत्तचित्रमार्फत घटनाबाट प्रभावित विद्यार्थी, शिक्षक, अभिभावक र स्थानीय समुदायले भोगेको पीडालाई प्रस्तुत गरिएको जनाएका छन्। उनीहरूका अनुसार स्टारोबेल्स्क घटना पीडित परिवार मात्र नभई सिंगो सहर र व्यापक रूसी समाजका लागि गहिरो दुःखद घटना बनेको छ।
वृत्तचित्रमा घटनाको मानवीय पक्ष, बाँचेकाहरूको स्मृति र युद्धजन्य हिंसाले सामान्य नागरिक, विशेषगरी विद्यार्थी समुदायमा पार्ने प्रभावलाई मुख्य विषय बनाइएको छ।
