राफा नाका खुलेपछि गाजाबाट स्वास्थ्य उपचारका लागि उद्धार पुनः सुरु हुने
राफा नाका पुनः खुलेसँगै गाजाबाहिर उपचार आवश्यक परेका बिरामीहरूको चिकित्सकीय उद्धार पुनः सुरु गर्न तयारी भएको संयुक्त राष्ट्रसंघीय मानवीय निकायहरूले जनाएका छन्।
संयुक्त राष्ट्रसंघीय मानवीय मामिला समन्वय कार्यालय (ओचा) का अनुसार इजिप्टसँगको सीमा क्षेत्रमा रहेको राफा नाका बुधबार सीमित संख्याका मानिसहरूको आवतजावतका लागि पुनः खोलिएको हो। इजरायली अधिकारीहरूले लगाएको दुई दिनको बन्दपछि नाका खोलिएको ओचाले जनाएको छ। गाजा पट्टीतर्फ फर्किने मानिसहरूलाई समेत आवश्यक सहायता उपलब्ध गराइएको छ।
खाद्यान्न र अन्य मानवीय सामग्री ढुवानीका लागि केरेम शालोम/करेम अबु सालेम नाका पनि पुनः सञ्चालनमा आएको छ। तर हाल मालसामान ढुवानीका लागि उपलब्ध एक मात्र नाका यही भएकाले राहत सञ्चालन अझै गम्भीर रूपमा सीमित रहेको ओचाको पछिल्लो स्थिति विवरणमा उल्लेख छ।
विश्व खाद्य कार्यक्रम (डब्लुएफपी) ले गत महिना गाजा पट्टीमा करिब १४ लाख मानिससम्म सहायता पुर्याएको जनाएको छ। उक्त सहायता खाद्यान्न प्याकेट, रोटीका प्याकेज, तातो खाना र कुपोषण उपचारका रूपमा उपलब्ध गराइएको थियो। संस्थाका अनुसार करिब पाँच लाख मानिसलाई नगद सहायता पनि प्रदान गरिएको छ।
यसैबीच, संयुक्त राष्ट्रसंघीय मानवअधिकार उच्चायुक्त कार्यालय (ओएचसीएचआर) का अनुसार इजरायली सेनाको समर्थन पाएका प्यालेस्टिनी सशस्त्र समूहहरूले मंगलबार केही प्यालेस्टिनीलाई नियन्त्रणमा लिएका थिए। नियन्त्रणमा लिइएकामध्ये प्यालेस्टाइन रेड क्रिसेन्ट सोसाइटीका एम्बुलेन्स कर्मचारीसमेत रहेको जनाइएको छ।
ओएचसीएचआरले सामाजिक सञ्जाल एक्समार्फत इजरायललाई गाजामा सार्वजनिक व्यवस्था र सुरक्षा सुनिश्चित गर्न आग्रह गरेको छ। साथै, चिकित्सा सेवामा अवरोध पुर्याउनेसहित अन्तर्राष्ट्रिय कानुन उल्लंघन हुने कार्यबाट टाढा रहन र त्यस्ता कार्य रोक्न पनि आग्रह गरिएको छ।
पश्चिम किनारामा पनि इजरायली सेना र बसोबासीहरूबाट प्यालेस्टिनीहरूमाथि हिंसा भएका विवरणहरू जारी छन्। ओचाका अनुसार यस वर्षको सुरुदेखि सोमबारसम्म पश्चिम किनारामा ५७ जना प्यालेस्टिनी मारिएका छन्। तीमध्ये १३ बालबालिका र दुई महिला छन्। मारिएकामध्ये ४१ जना इजरायली सेनाबाट, १३ जना इजरायली बसोबासीबाट र तीन जना इजरायली सेना वा बसोबासीमध्ये कसैबाट मारिएको जनाइएको छ।
ओचाले यस वर्ष अहिलेसम्म २३० भन्दा बढी समुदायमा हताहती वा सम्पत्ति क्षति हुने गरी ९८० भन्दा बढी बसोबासीसम्बन्धी घटना अभिलेख गरेको जनाएको छ। यो औसतमा दैनिक छ वटा घटनासरह हो।
संयुक्त राष्ट्रसंघीय मानवीय कार्यालयले सर्वसाधारण नागरिक, स्वास्थ्यकर्मी तथा मानवीय सेवामा संलग्न व्यक्तिहरूको सुरक्षा सुनिश्चित गर्न र अन्तर्राष्ट्रिय कानुनको पूर्ण सम्मान गर्न पुनः आह्वान गरेको छ।
