युनिफिलपछि पनि लेबनानमा संयुक्त राष्ट्रसंघीय सुरक्षा उपस्थिति कायम राख्न गुटेरेसको आग्रह
संयुक्त राष्ट्रसंघका महासचिव एन्टोनियो गुटेरेसले लेबनानबाट संयुक्त राष्ट्रसंघीय अन्तरिम बल युनिफिल फिर्ता भएपछि पनि संयुक्त राष्ट्रसंघको “वर्दीधारी उपस्थिति” कायम राख्न आग्रह गरेका छन्। युनिफिल फिर्ता गर्ने प्रक्रिया यस वर्षको अन्त्यदेखि सुरु हुने तय भएको छ।
मध्यपूर्वको अवस्थाबारे संयुक्त राष्ट्रसंघीय सुरक्षा परिषद्को खुला बहसमा बुधबार बोल्दै गुटेरेसले क्षेत्र थप गहिरो संकटतर्फ धकेलिँदै गएको र त्यसका असरहरू क्षेत्रभन्दा बाहिरसम्म फैलिन सक्ने चेतावनी दिए।
“यसले पूर्ण रूपमा द्वन्द्व पुनः सुरु गराउन सक्ने सम्भावनाप्रति म अत्यन्त चिन्तित छु,” महासचिव गुटेरेसले भने।
उनले मध्यपूर्वमा हुने तनाववृद्धिको असर सीमा र महादेश पार गर्दै फैलिने उल्लेख गर्दै त्यसको कठोर मूल्य क्षेत्रका जनताले तिरिरहेको बताए। विशेषगरी कमजोर देश र समुदायहरूमा यसको प्रभाव अझ गम्भीर रूपमा देखिन सक्ने उनको भनाइ थियो।
गुटेरेसले मार्चयता लेबनानमा तनाव बढेको उल्लेख गरे। उनका अनुसार इजरायलले लेबनानी भूभागमा आफ्नो सैन्य कारबाही तीव्र पारेको छ भने हिजबुल्लाहले पनि इजरायलभित्र थप गहिरोसम्म आक्रमण गरेको छ।
उनले दक्षिणी लेबनानमा सर्वसाधारणको मृत्यु, सम्पूर्ण समुदाय विस्थापित हुनु, घर तथा नागरिक पूर्वाधारमा व्यापक क्षति हुनु र १० लाखभन्दा बढी नागरिक जबर्जस्ती विस्थापित हुनु गम्भीर चिन्ताको विषय भएको बताए।
महासचिवका अनुसार हालसम्म सात जना संयुक्त राष्ट्रसंघीय शान्ति सैनिक मारिएका छन्, जसमध्ये एक जना गत साता मारिएका हुन्।
गुटेरेसले सबै पक्षलाई संयुक्त राष्ट्रसंघीय सुरक्षा परिषद्को प्रस्ताव १७०१ अनुरूप लेबनानको अन्तर्राष्ट्रिय मान्यताप्राप्त सीमाभित्रको भौगोलिक अखण्डता, सार्वभौमिकता र राजनीतिक स्वतन्त्रताको पूर्ण सम्मान गर्ने कूटनीतिक समाधानतर्फ अघि बढ्न आग्रह गरे।
उनले सुरक्षा परिषद्लाई गत साता पठाएको पत्रमा प्रस्ताव गरेअनुसार युनिफिलको प्रस्थानपछि पनि संयुक्त राष्ट्रसंघको वर्दीधारी उपस्थिति निरन्तर रहने व्यवस्था गर्न आग्रह गरे।
सुरक्षा परिषद्को प्रस्ताव २७९० अनुसार युनिफिलले डिसेम्बर ३१ देखि आफ्नो सञ्चालन बन्द गर्नेछ। सोही मितिदेखि लेबनानबाट जनशक्ति क्रमशः घटाउने र एक वर्षभित्र फिर्ता गर्ने प्रक्रिया पूरा गरिनेछ।
