चीनले अमेरिकी अनुसन्धानकर्तालाई जासुसी आरोपमा पक्राउ गरेको पुष्टि

बेइजिङ – चीन सरकारले एक अमेरिकी नागरिकलाई जासुसी गरेको आरोपमा पक्राउ गरेको छ। चीनको परराष्ट्र मन्त्रालयले शुक्रबार औपचारिक रूपमा यो जानकारी सार्वजनिक गरेको हो।

पक्राउ पर्नेमा म्यानमारमा जन्मिएका अमेरिकी नागरिक मिन जिन (Min Zin) रहेको छ। उनी म्यानमार रणनीति तथा नीति अध्ययन संस्थान (ISP-Myanmar) का कार्यकारी निर्देशक तथा राजनीतिक विश्लेषक हुन्। उनलाई गत जुन ३ मा चीनको युन्नान प्रान्तको राजधानी कुनमिङ विमानस्थलमा एक सम्मेलनमा सहभागी हुन पुगेका बेला पक्राउ गरिएको हो।

चीनको परराष्ट्र मन्त्रालयका प्रवक्ता लिन जियानले पत्रकार सम्मेलनमा जानकारी दिँदै भने, “मिन जिनमाथि चीनको राष्ट्रिय सुरक्षामा खतरा पुर्याउने जासुसी गतिविधिमा संलग्न रहेको आरोपमा कानूनी कारबाही भइरहेको छ। उनका सबै कानूनी अधिकारहरूको पूर्ण संरक्षण गरिएको छ र यसबारे अमेरिकी वाणिज्य दूतावासलाई जानकारी गराइसकिएको छ।”

मिन जिन सन् १९८८ को म्यानमारको प्रजातन्त्र आन्दोलनमा विद्यार्थी कार्यकर्ताका रूपमा सक्रिय थिए। त्यतिबेला उनी पक्राउबाट बच्न थाइल्याण्ड भागेका थिए। पछि उनी अमेरिका गएर राजनीति विज्ञानमा क्यालिफोर्निया विश्वविद्यालय, बर्कलेमा पीएचडी गरिरहेका छन्। उनी हाल थाइल्याण्डमा बस्दै आएका थिए।

चीनले विदेशी नागरिकलाई राष्ट्रिय सुरक्षाको आरोपमा पक्राउ गर्नु असामान्य घटना हो। यो पक्राउ अमेरिकी राष्ट्रपति डोनाल्ड ट्रम्पको चीन भ्रमणको केही सातापछि भएको हो। म्यानमारका राष्ट्रपति मिन आङ ह्लाइङले पनि अर्को साता बेइजिङ भ्रमण गर्दै छन्।

मिन जिनको अनुसन्धानको मुख्य केन्द्रविन्दु चीन–म्यानमार सम्बन्ध रहँदै आएको छ। उनले चीनको विदेश नीति, म्यानमारको आन्तरिक द्वन्द्व र चीनको भूमिकाबारे व्यापक लेखन गरेका छन्। अमेरिकी विदेश विभागले यसबारे जानकारी पाएको र आवश्यक कन्सुलर सहायता उपलब्ध गराउने प्रतिक्रिया दिएको छ।

उनको परिवार र सहकर्मीहरूले यस विषयमा चिनियाँ प्रशासन र अमेरिकी दूतावाससँग सम्पर्कमा रहेको जनाइएको छ। मिन जिन यसै महिना काठमाडौंमा हुने एक अन्तर्राष्ट्रिय सम्मेलनमा वक्ताका रूपमा सहभागी हुने तयारी थियो।