मोरक्कोको चुनौतीमा ब्राजिल बराबरीमै रोकियो
काठमाडौं । पाँचपटकको विश्वकप विजेता ब्राजिलले फिफा विश्वकप २०२६ को समूह ‘सी’ अन्तर्गत आफ्नो पहिलो खेलमा मोरक्कोसँग १–१ को बराबरी खेलेको छ। बलियो प्रतिद्वन्द्वीका रूपमा मैदान उत्रिएको मोरक्कोले सुरुआतमै आक्रामक खेल प्रस्तुत गरेपछि ब्राजिल अपेक्षाअनुसार सहज जित निकाल्न असफल भएको हो।
मेटलाइफ स्टेडियममा भएको खेलमा मोरक्कोले २१औँ मिनेटमा अग्रता लिएको थियो। ब्राहिम डियाजको पासमा इस्माइल साइबरीले गोल गर्दै मोरक्कोलाई १–० ले अघि बढाएका थिए। खेलको सुरुआती चरणमै मोरक्कोले ब्राजिलको रक्षापंक्तिमाथि निरन्तर दबाब बनाएको थियो। पहिलो १५ मिनेटभित्रै मोरक्कोले ब्राजिलको पोस्टतर्फ पटक–पटक आक्रमण गरेको थियो।
तर मोरक्कोको अग्रता धेरै समय टिक्न सकेन। ३२औँ मिनेटमा भिनिसियस जुनियरले ब्राजिलका लागि बराबरी गोल फर्काए। ब्रुनो गिमारेसको पासमा भिनिसियसले गोल गरेपछि खेल १–१ को अवस्थामा पुगेको थियो। त्यसपछि पहिलो हाफ दुवै टोलीले एक–एक गोलको बराबरीमा टुंग्याए।
पहिलो हाफमा बल नियन्त्रणमा ब्राजिल केही अघि देखिए पनि गोलका अवसर सिर्जनामा मोरक्को बढी खतरनाक देखिएको थियो। मोरक्कोले ब्राजिलको पोस्टतर्फ लगातार दबाब बनाउँदा ब्राजिलको रक्षापंक्ति व्यस्त रह्यो। पहिलो हाफमै ब्राजिलका कासेमिरो र रोजर इबानेजले पहेँलो कार्ड पाएका थिए।
ब्राजिल नेयमारबिनै मैदानमा उत्रिएको थियो। चोटका कारण नेयमारलाई विश्राम दिइएपछि ब्राजिलको आक्रमणको जिम्मेवारी भिनिसियस जुनियर र इगोर थियागोले सम्हालेका थिए। तर मोरक्कोको अनुशासित रक्षापंक्ति र तीव्र प्रतिआक्रमणका कारण ब्राजिलले खुलेर खेल्न सकेन।
दोस्रो हाफ सुरु भएसँगै ब्राजिलले दुई खेलाडी परिवर्तन गर्यो। पहेँलो कार्ड पाएका रोजर इबानेजको स्थानमा ड्यानिलो र कासेमिरोको स्थानमा फाबिन्होलाई मैदानमा उतारियो। त्यसपछि पनि ब्राजिलले आक्रमणमा गति थप्ने प्रयास गर्यो। पछि लुकास पाकिटाको स्थानमा म्याथ्यु कुना र इगोर थियागोको स्थानमा लुइज हेन्रिकलाई मैदानमा पठाइएको थियो।
मोरक्कोले पनि दोस्रो हाफमा केही खेलाडी परिवर्तन गर्दै खेलमा सन्तुलन कायम राख्ने प्रयास गर्यो। ब्राहिम डियाजको स्थानमा चेम्स्डीने र एजेदिने औनाहीको स्थानमा समीर एल माउरबेटलाई मौका दिइएको थियो। अन्तिमतिर गोलकर्ता साइबरीको स्थानमा सौफनी रहिमी मैदानमा आएका थिए।
अन्तिम समयमा ब्राजिलले केही आकर्षक आक्रमण बुने पनि मोरक्कोको रक्षापंक्तिले त्यसलाई सफल हुन दिएन। निर्धारित ९० मिनेटपछि थपिएको समयसम्म पनि दुवै टोलीबाट थप गोल हुन सकेन। अन्ततः खेल १–१ को बराबरीमा सकियो।
बराबरीसँगै ब्राजिल र मोरक्को दुवैले समूह ‘सी’ मा एक–एक अंक जोडेका छन्। पाँचपटकको विश्व विजेता ब्राजिलका लागि यो नतिजा अपेक्षाभन्दा कमजोर सुरुआत मानिएको छ भने पछिल्लो विश्वकपमा सेमिफाइनलसम्म पुगेको मोरक्कोका लागि यो उत्साहजनक नतिजा बनेको छ।
फिफा वरीयतामा ब्राजिल छैटौँ र मोरक्को सातौँ स्थानमा रहेकाले यो खेल समूह चरणकै रोचक प्रतिस्पर्धामध्ये एक मानिएको थियो। मैदानमा पनि मोरक्कोले त्यही स्तरको चुनौती प्रस्तुत गर्यो। ब्राजिलले आफ्नो अनुभव र व्यक्तिगत प्रतिभाका आधारमा हार टारे पनि टोलीले आगामी खेलमा प्रदर्शन सुधार्नुपर्ने देखिएको छ।
समूह ‘सी’ मा अब ब्राजिलले बाँकी खेलमा जित निकाल्ने दबाब झेल्नेछ। मोरक्को भने पहिलो खेलबाट पाएको अंक र आत्मविश्वासलाई निरन्तरता दिने लक्ष्यमा रहनेछ।
तस्बिरहरू : एपी
