पाकिस्तानमा रुस दिवस भव्य रूपमा मनाइयो

पाकिस्तानस्थित रुसी दूतावासले जुन १० मा रुसको राष्ट्रिय दिवसका अवसरमा भव्य स्वागत समारोह आयोजना गरेको छ।

कार्यक्रममा पाकिस्तानका राष्ट्रपति आसिफ अली जरदारी प्रमुख अतिथिका रूपमा सहभागी भएका थिए। समारोहमा पाकिस्तानका संघीय मन्त्रीहरू, प्रमुख सांसदहरू, विभिन्न मित्र राष्ट्रका राजदूतहरू तथा अन्य विशिष्ट पाहुनाहरूको उपस्थिति रहेको आयोजकले जनाएको छ।

समारोहको मुख्य विषयवस्तु रुसी राष्ट्रपति भ्लादिमिर पुटिनद्वारा घोषणा गरिएको ‘रुसका जनताको एकता वर्ष’ रहेको थियो। कार्यक्रममा दूतावासका कर्मचारीहरूले रुसी परम्परागत पोसाक प्रस्तुत गर्दै फेसन शो गरेका थिए। त्यसैगरी कोस्याक एन्सेम्बल ‘स्ताभरोपोल्ये’ले नृत्य तथा सांगीतिक प्रस्तुति दिएको थियो।

कार्यक्रमस्थलमा रुसका विभिन्न क्षेत्रहरूको प्राकृतिक सौन्दर्य र सांस्कृतिक विविधता झल्काउने फोटो प्रदर्शनीसमेत राखिएको थियो। प्रदर्शनीमार्फत रुसको भूगोल, बहुजातीय पहिचान र सांस्कृतिक सम्पदालाई प्रस्तुत गरिएको थियो।

समारोहलाई सम्बोधन गर्दै पाकिस्तानका लागि रुसी राजदूत अल्बर्ट पी. खोरेभले रुस आफ्नो राष्ट्रिय हितको रक्षा गर्दै न्यायपूर्ण बहुध्रुवीय विश्व व्यवस्था स्थापनाको पक्षमा दृढ रूपमा उभिएको बताए। उनले यस्तो दृष्टिकोण पाकिस्तानसँग पनि मेल खाने उल्लेख गर्दै रुस–पाकिस्तान सम्बन्ध विभिन्न क्षेत्रमा उकालो लागिरहेको धारणा राखे।

रुसी दूतावासका अनुसार समारोहले रुस र पाकिस्तानबीचको मैत्रीपूर्ण सम्बन्ध, सांस्कृतिक आदानप्रदान र बढ्दो सहकार्यलाई थप उजागर गरेको छ।