बीआरआईमार्फत नेपाललाई भूजडित बनाउन चीन तयार
बेइजिङ — चिनियाँ विदेशमन्त्री वाङ यीले उच्च गुणस्तरीय बेल्ट एन्ड रोड इनिसिएटिभ (बीआरआई) सहकार्यलाई अघि बढाउँदै नेपाललाई भूपरिवेष्ठित अवस्थाबाट भूजडित राष्ट्रमा रूपान्तरण गर्न चीन तयार रहेको बताएका छन्।
चीन भ्रमणमा रहेका नेपालका परराष्ट्रमन्त्री शिशिर खनालसँग बेइजिङमा भएको भेटवार्ताका क्रममा वाङले नेपालसँगको सम्बन्धलाई चीनले आफ्नो छिमेकी कूटनीतिको महत्वपूर्ण स्थानमा राख्दै आएको उल्लेख गरे। चाइना डेली, सिन्ह्वा र चिनियाँ विदेश मन्त्रालयले प्रकाशित गरेका विवरणअनुसार वाङले चीनको नेपालप्रतिको मैत्रीपूर्ण नीति सम्पूर्ण नेपाली जनताप्रति केन्द्रित रहेको बताएका छन्।
वाङले चीनले नेपालको राष्ट्रिय सार्वभौमसत्ता, स्वतन्त्रता र भौगोलिक अखण्डताको सम्मान गर्दै आएको उल्लेख गर्दै नेपालले आफ्नै राष्ट्रिय परिस्थितिअनुसार विकासको बाटो रोज्ने अधिकारलाई चीनले समर्थन गर्ने बताए। उनले जनसमर्थनका आधारमा बनेको नेपालको नयाँ सरकार प्रभावकारी रूपमा शासन सञ्चालन गर्न सफल हुने चीनको अपेक्षा रहेको धारणा पनि व्यक्त गरे।
चिनियाँ विदेशमन्त्रीले नेपालसँग उच्च गुणस्तरीय बीआरआई सहकार्यलाई थप गति दिन चीन इच्छुक रहेको बताए। उनले विद्युत् प्रसारण लाइन, सडक, सीमा नाका, हवाई सम्पर्क तथा अन्य अन्तरआबद्धता विस्तारका क्षेत्रमा सहकार्य अघि बढाउन सकिने उल्लेख गर्दै यस्ता परियोजनाले नेपाललाई भूपरिवेष्ठित मुलुकबाट क्षेत्रीय तथा अन्तर्राष्ट्रिय सञ्जालसँग जोडिएको भूजडित राष्ट्र बनाउन मद्दत गर्ने धारणा राखे।
वार्ताका क्रममा वाङले नेपालले ‘एक चीन नीति’प्रति व्यक्त गर्दै आएको दृढ प्रतिबद्धताको चीनले उच्च मूल्याङ्कन गरेको बताए। ताइवान र सिजाङसँग सम्बन्धित विषय चीनका मूलभूत हितसँग जोडिएका विषय भएको उल्लेख गर्दै उनले ती विषयमा नेपालले देखाएको समर्थनलाई चीनले सकारात्मक रूपमा लिएको बताए।
वाङले दुई देशबीच रहेका सहकार्य संयन्त्र र मञ्चहरूको प्रभावकारी उपयोग गर्दै व्यावहारिक सहयोगलाई थप गहिरो बनाउनुपर्नेमा जोड दिए। आर्थिक सहकार्य, पूर्वाधार विकास, व्यापार, लगानी, सांस्कृतिक आदानप्रदान र जनस्तरको सम्बन्ध विस्तार नेपाल–चीन सम्बन्धलाई थप सुदृढ बनाउने महत्वपूर्ण आधार रहेको उनको भनाइ थियो।
चिनियाँ विदेशमन्त्रीले चिनियाँ कम्पनीहरूलाई नेपालमा लगानी र व्यवसाय विस्तार गर्न चीनले प्रोत्साहित गरिरहेको उल्लेख गरे। उनले नेपालले चिनियाँ उद्यमी तथा लगानीकर्ताका लागि अझ निष्पक्ष, पारदर्शी, कानुनसम्मत र लगानीमैत्री व्यावसायिक वातावरण उपलब्ध गराउने अपेक्षा व्यक्त गरे।
वाङले बहुपक्षीय मञ्चहरूमा पनि नेपाल र चीनबीच समन्वय बढाउनुपर्ने बताए। उनले विकासशील राष्ट्रहरूको साझा हित, अधिकार र आवाजको रक्षा गर्न दुवै मुलुकले आपसी सहकार्यलाई थप बलियो बनाउनुपर्नेमा जोड दिए।
प्रत्युत्तरमा परराष्ट्रमन्त्री खनालले नेपालको नयाँ सरकार जनमुखी विकास, सुशासन र जनजीविकामा सुधार ल्याउने कार्यप्रति प्रतिबद्ध रहेको बताए। उनले नेपालले असंलग्न परराष्ट्र नीतिलाई निरन्तरता दिने उल्लेख गर्दै सबै मित्रराष्ट्रसँग समानता, पारस्परिक सम्मान र पारस्परिक लाभका आधारमा सम्बन्ध अघि बढाउने धारणा राखे।
खनालले नेपालको विकास र जनजीविकामा सुधारका लागि चीनले लामो समयदेखि पुर्याउँदै आएको सहयोगप्रति धन्यवाद व्यक्त गरे। उनले चीनले नेपाललाई सधैं समान हैसियतमा व्यवहार गरेको, नेपालको सार्वभौमसत्ता र स्वतन्त्रताको सम्मान गरेको तथा नेपालको विकास प्रयासमा साथ दिँदै आएको बताए।
परराष्ट्रमन्त्री खनालले ताइवान र सिजाङसम्बन्धी विषय चीनका आन्तरिक मामिला भएको उल्लेख गर्दै नेपाल ‘एक चीन नीति’प्रति दृढ रहेको दोहोर्याए। उनले चीनको राष्ट्रिय एकीकरणसम्बन्धी प्रयासलाई नेपालले समर्थन गर्ने र नेपाली भूमि चीनविरोधी कुनै पनि गतिविधिका लागि प्रयोग हुन नदिने प्रतिबद्धता व्यक्त गरे।
खनालले चीनको विकास नेपालका लागि अवसर भएको बताउँदै चिनियाँ लगानीलाई नेपालले स्वागत गर्ने धारणा राखे। उनले चिनियाँ उद्यमी र लगानीकर्ताका लागि नेपालले कानुनसम्मत, निष्पक्ष, पारदर्शी र मैत्रीपूर्ण व्यावसायिक वातावरण निर्माण गर्ने बताए।
वार्ताका क्रममा खनालले नेपाल उच्च गुणस्तरीय बीआरआई सहकार्यमा सक्रिय रूपमा सहभागी हुन तयार रहेको बताए। उनले पूर्वाधार, अन्तरआबद्धता, व्यापार, लगानी, प्रविधि, पर्यटन, ऊर्जा तथा जनस्तरको आदानप्रदानलगायतका क्षेत्रमा पारस्परिक लाभका आधारमा सहकार्य विस्तार गर्न नेपाल इच्छुक रहेको स्पष्ट पारे।
खनालले बहुपक्षीय मञ्चहरूमा नेपाल र चीनबीचको समन्वय थप सुदृढ बनाउनुपर्नेमा जोड दिए। उनले विकासशील राष्ट्रहरूको साझा हित र अधिकारको पक्षमा सहकार्य गर्न नेपाल तयार रहेको बताउँदै मानवताको साझा भविष्य निर्माण गर्ने चीनको अवधारणाप्रति नेपाल सकारात्मक रहेको उल्लेख गरे।
सिसिटिभी प्लसले यसअघि परराष्ट्रमन्त्री खनालको चीन भ्रमणबारे चिनियाँ विदेश मन्त्रालयको नियमित पत्रकार सम्मेलनसम्बन्धी भिडियो सामग्री सार्वजनिक गरेको थियो। उक्त सामग्रीमा चिनियाँ पक्षले नेपालसँग उच्च गुणस्तरीय बीआरआई सहकार्य अघि बढाउने र दुई देशबीचको परम्परागत मित्रतालाई थप गहिरो बनाउने अपेक्षा व्यक्त गरेको थियो।
बेइजिङमा भएको भेटवार्ताले नेपाल–चीन सम्बन्धलाई नयाँ राजनीतिक परिस्थितिमा थप विश्वास, विकास सहकार्य र अन्तरआबद्धताका आधारमा अघि बढाउने साझा प्रतिबद्धता दोहोर्याएको छ। खनालको चीन भ्रमणलाई नेपाल–चीन सम्बन्ध, बीआरआई सहकार्य, चिनियाँ लगानी प्रवर्द्धन र क्षेत्रीय कूटनीतिक सन्तुलनका दृष्टिले महत्वपूर्ण रूपमा हेरिएको छ।
