स्पेनलाई रोक्दै केप भर्डको ऐतिहासिक सुरुवात, नायक बने ४० वर्षीय गोलकिपर बोजिन्हा
एटलान्टा । विश्वकपमा पहिलोपटक सहभागी भएको केप भर्डले आफ्नो डेब्यु खेलमै बलियो स्पेनलाई गोलरहित बराबरीमा रोक्दै ऐतिहासिक नतिजा निकालेको छ।
एटलान्टा स्टेडियममा सम्पन्न खेलमा युरोपेली च्याम्पियन स्पेनले लगातार दबाब बनाए पनि केप भर्डका ४० वर्षीय गोलकिपर बोजिन्हा टोलीका लागि पर्खाल बनेर उभिए। उनले खेलभर महत्वपूर्ण बचाउ गर्दै स्पेनलाई गोल गर्न दिएनन्।
खेल सकिएपछि केप भर्डका खेलाडी र समर्थकहरू खुसीयालीमा रमाए। विश्वकपको पहिलो खेलमै उपाधि दाबेदार टोलीलाई रोक्न सफल भएपछि केप भर्डका लागि यो नतिजा ऐतिहासिक उपलब्धि बनेको छ।
‘प्लेयर अफ द म्याच’ घोषित बोजिन्हा खेलपछि भावुक देखिए। उनले आफ्नो सफलताको क्षणमा आफूलाई हुर्काउने हजुरबुबा–हजुरआमालाई सम्झिएको बताए। साथै, भिसा र आर्थिक कारणले आफ्नी आमा समयमै खेल हेर्न आउन नसकेको पनि उल्लेख गरे।
बोजिन्हाले केप भर्ड विश्वकपमा केवल सहभागिताका लागि नभई देशका लागि प्रतिस्पर्धा गर्न आएको बताए। उनले टोलीको एकता, अनुशासन र आत्मविश्वास नै स्पेनविरुद्धको सफलताको आधार भएको बताए।
जोसिमार डियासको नामले चिनिने बोजिन्हाले ४० वर्ष १२ दिनको उमेरमा विश्वकपमा डेब्यु गर्दै विशेष कीर्तिमान पनि बनाएका छन्। उनी विश्वकपमा डेब्यु गर्ने सबैभन्दा पाका खेलाडीमध्ये एक बनेका छन्।
बोजिन्हाको फुटबल यात्रा संघर्षपूर्ण रहँदै आएको छ। उनले २५ वर्षको उमेरपछि मात्र व्यावसायिक फुटबल सुरु गरेका थिए। सीमित पूर्वाधार र अवसर भएको सानो टापु राष्ट्र केप भर्डबाट आएका उनले अवसरको खोजीमा युरोप तथा अन्य मुलुकका क्लबहरूबाट व्यावसायिक फुटबल खेले।
स्पेनविरुद्धको खेलमा उनले सात महत्वपूर्ण बचाउ गरे। उनको प्रदर्शनसँगै केप भर्डका डिफेन्डरहरूको अनुशासित खेलको पनि फुटबल विश्लेषक र समर्थकहरूले प्रशंसा गरेका छन्।
करिब साढे पाँच लाख जनसंख्या भएको केप भर्ड विश्वकपमा छनोट हुने साना राष्ट्रमध्ये एक हो। आफ्नो पहिलो खेलमै स्पेनजस्तो शक्तिशाली टोलीलाई रोक्दै केप भर्डले विश्व फुटबलमा सम्झनलायक उपस्थिति जनाएको छ।
