शिक्षा, विज्ञान–प्रविधि र प्रतिभा विकासको एकीकृत प्रवर्द्धनबारे सी चिनफिङको लेख प्रकाशित हुने
बेइजिङ । चिनियाँ कम्युनिष्ट पार्टी (सीपीसी) केन्द्रीय समितिका महासचिव सी चिनफिङको शिक्षा, विज्ञान तथा प्रविधि र प्रतिभा विकासको एकीकृत प्रवर्द्धनसम्बन्धी लेख मंगलबार प्रकाशित हुने भएको छ।
चीनका राष्ट्रपति तथा केन्द्रीय सैन्य आयोगका अध्यक्षसमेत रहेका सीको उक्त लेख सीपीसी केन्द्रीय समितिको प्रमुख पत्रिका ‘छ्योउशी’ जर्नलको यस वर्षको १२औँ अंकमा प्रकाशित हुनेछ।
लेख सन् २०१२ डिसेम्बरदेखि सन् २०२६ अप्रिलसम्म सीले गरेका सम्बोधन तथा विचारहरूको अंशमा आधारित रहेको जनाइएको छ।
लेखमा शिक्षा, विज्ञान तथा प्रविधि र प्रतिभा सबै पक्षबाट आधुनिक समाजवादी मुलुक निर्माणका लागि आधारभूत र रणनीतिक स्तम्भ भएको उल्लेख गरिएको छ।
शिक्षाले विज्ञान, प्रविधि र प्रतिभा विकासलाई अझ प्रभावकारी रूपमा टेवा दिनुपर्ने लेखमा जोड दिइएको छ। उच्चस्तरीय अनुसन्धान विश्वविद्यालयहरूलाई राष्ट्रिय आधारभूत अनुसन्धानका मुख्य प्रेरक शक्ति र महत्वपूर्ण वैज्ञानिक तथा प्राविधिक सफलताका केन्द्रका रूपमा प्रस्तुत गरिएको छ।
लेखमा उच्च शिक्षाको संरचना अनुकूलन गर्न, विश्वविद्यालयहरूमा फरक–फरक सुधारलाई अघि बढाउन र नवप्रवर्तनशील प्रतिभाको विकासका लागि उपयुक्त वातावरण निर्माण गर्न अध्यापन पद्धति अद्यावधिक गर्नुपर्ने उल्लेख छ।
अझ प्रभावकारी राष्ट्रिय नवप्रवर्तन प्रणाली निर्माणको आवश्यकता औँल्याउँदै लेखले विज्ञान तथा प्रविधिसम्बन्धी कार्यमा पार्टी केन्द्रीय समितिको एकीकृत नेतृत्व सुदृढ गर्नुपर्नेमा जोड दिएको छ।
लेखमा आधारभूत अनुसन्धान क्षमताको निरन्तर सुदृढीकरण, मौलिक नवप्रवर्तनको प्रवर्द्धन तथा प्रमुख क्षेत्रका मूल प्रविधि र अग्रणी प्रविधिमा सफलता हासिल गर्न अनुसन्धानलाई तीव्र बनाउनुपर्ने उल्लेख गरिएको छ।
त्यसैगरी, वैज्ञानिक अनुसन्धानको अग्रपंक्तिमा रहेका प्रतिभाहरूको पहिचान र विकास गर्न, आधारभूत अनुसन्धानमा संलग्न जनशक्ति विस्तार गर्न तथा युवा वैज्ञानिकहरूको विकास र सफलताका लागि सहयोग पुर्याउनुपर्ने आवश्यकता पनि लेखमा औँल्याइएको छ।
