ग्रामीण भेगमै पुग्यो विशेषज्ञ स्वास्थ्य सेवा

मोन्डोक — स्थानीय सरकारले सञ्चालन गरेको लक्षित सार्वजनिक स्वास्थ्य अभियानले दुर्गम ग्रामीण बस्तीका बासिन्दालाई घरदैलोमै विशेषज्ञ सेवा उपलब्ध गराएको छ। बाबाङ जिल्ला अन्तर्गतको ग्रामीण स्वास्थ्य केन्द्रले एकीकृत स्वास्थ्य शिविरको आयोजना गर्दै स्थानीयवासीलाई निःशुल्क परामर्श, परीक्षण र औषधि वितरण गरेको हो।

स्वास्थ्य संस्थाले विशेषज्ञ चिकित्सकसहितको टोली परिचालन गरी बासिन्दाको रगतमा चिनीको मात्रा (सुगर) र रक्तचाप (प्रेसर) परीक्षण ग¥यो। साथै, क्षेत्रमा सामान्यतः देखिने स्वास्थ्य समस्या, उच्च पहाडी भूगोलका कारणले हुने विशेष प्रकृतिका रोगहरू तथा मौसमी रोगको पहिचान र रोकथामका उपायबारे पनि बृहत् परामर्श दिइयो।

सोही क्रममा स्थानीय बासिन्दालाई उच्च हिमाली क्षेत्रको मौसमी विशेषता र जीवनशैली अनुकूल हुने गरी औषधिको सही प्रयोग विधि, दैनिक पोषणयुक्त आहारविहार, सरसफाइ र स्वास्थ्य सावधानीका बारेमा वैज्ञानिक जानकारी दिइयो। यसले स्थानीयलाई आफ्नो स्वास्थ्य स्वयं व्यवस्थापन गर्न सक्ने क्षमताको विकास गर्न प्रेरित गरेको छ।

यसका साथै, चिकित्सकको टोलीले यसअघि नै पहिचान भइसकेका स्थानीय दीर्घरोगीको पुनः जाँच (फलोअप) र स्वास्थ्य अवस्थाको पुनर्मूल्याङ्कन ग¥यो। हरेक बिरामीको अवस्था हेरेर व्यक्तिगत उपचार योजना पनि परिमार्जन गरियो। यसले स्थानीय स्तरमा हुने सामान्य तथा मौसमी बिमारको नियमित र स्तरीय नियन्त्रणलाई प्रभावकारी बनाएको छ।

यसअघि घरमै रहेका बिरामीलाई लक्षित गर्दै स्वास्थ्यकर्मीले आवश्यकताअनुसार नियमित औषधि र मौसमी रोग नियन्त्रणका लागि विशेष औषधि समेत निःशुल्क वितरण गरे। टोलीले औषधि सेवनको उपाय, पालना गर्नुपर्ने सावधानी र दैनिकीमा ध्यान दिनुपर्ने विषय स्पष्टसँग बुझाएको थियो। यसले सर्वसाधारणलाई सुरक्षित र विधिसम्मत तरिकाले मात्र औषधि प्रयोग गर्न अभिप्रेरित गरेको छ।

उक्त शिविरमार्फत जम्मा ७० भन्दा बढी बिरामीलाई स्थानीय रोगको प्रत्यक्ष उपचार सेवा दिइयो भने ५० भन्दा बढी प्रकारका निःशुल्क औषधि वितरण गरियो। आधारभूत तहमै पुगेर दिइएको यस सार्वजनिक सेवाले गाउँलेलाई ढोकैमा गुणस्तरीय, सहज र निःशुल्क उपचारको अनुभूति गराएको छ। यसले सर्वसाधारणको उपचारमा हुने आर्थिक भारलाई घटाएको मात्र नभई स्थानीय तहमा स्वास्थ्य सेवाको पहुँच र गुणस्तरमा सुधार ल्याएको छ।

स्वास्थ्य सेवाप्रति स्थानीय बासिन्दामा देखिएको विश्वास र सहभागिताले आगामी दिनमा पनि यस्ता शिविरलाई निरन्तरता दिन स्थानीय सरकारलाई थप हौसला मिलेको छ।