रूस–बेलारूसबीच विदेश नीतिमा समन्वय थप सुदृढ गर्ने सहमति

मिन्स्क । रूसी विदेशमन्त्री सर्गेई लाभरोभले रूस र बेलारूसबीचको सम्बन्ध मित्रवत्, खुला र विश्वासपूर्ण रहेको बताएका छन्।

बेलारूसका विदेशमन्त्री माक्सिम रिझेन्कोभसँगको वार्तापछि सोमबार मिन्स्कमा आयोजित संयुक्त पत्रकार सम्मेलनमा बोल्दै लाभरोभले रूस र बेलारूसबीच एकीकरण प्रक्रियाको ३०औँ वार्षिकोत्सव मनाइँदै गरेको उल्लेख गरे।

उनले दुवै देश विदेश नीतिमा घनिष्ठ सहयोग र साझा दृष्टिकोणका साथ अघि बढिरहेको बताए। लाभरोभका अनुसार रूस र बेलारूस आफ्ना सहयोगी प्रतिबद्धताप्रति दृढ छन् र दुई देशबीच मतभेद खोज्ने वा सम्बन्ध कमजोर पार्ने प्रयास सफल नहुनेछ।

लाभरोभले रूस र बेलारूसले संघ राज्यलाई सामाजिक–आर्थिक, सैन्य–प्राविधिक र अन्य सबै क्षेत्रमा थप सुदृढ बनाउने सहमति कार्यान्वयन गरिरहने बताए।

वार्तामा संघ राज्यभित्रको एकीकरण प्रक्रियालाई विदेश नीतिगत समर्थन प्रदान गर्ने र अन्तर्राष्ट्रिय मञ्चमा यसको भूमिका सुदृढ गर्ने विषयमा विशेष छलफल भएको उनले जानकारी दिए।

उनका अनुसार सन् २०२४–२०२६ का लागि समन्वित विदेश नीति कार्ययोजना र यस वर्षका मन्त्रीस्तरीय परामर्श योजनाको कार्यान्वयन प्रगतिप्रति दुवै पक्ष सन्तुष्ट छन्।

रूस र बेलारूसले संयुक्त राष्ट्रसंघसहित स्वतन्त्र राष्ट्रहरूको राष्ट्रमण्डल, युरेसियन आर्थिक संघ, शाङहाई सहयोग संगठन र अन्य क्षेत्रीय तथा अन्तर्राष्ट्रिय संयन्त्रमा समन्वय गहिरो बनाउने सहमति गरेका छन्। बेलारूस साझेदार राष्ट्रको हैसियतमा संलग्न रहेको ब्रिक्समा पनि समन्वय बढाइने लाभरोभले बताए।

यस वर्ष रूसले सामूहिक सुरक्षा सन्धि संगठनको अध्यक्षता गरिरहेको सन्दर्भमा कजानमा हालै सम्पन्न विदेशमन्त्री परिषद् बैठकका निष्कर्षबारे पनि विस्तृत छलफल भएको उनले जानकारी दिए।

युक्रेन संकटबारे बोल्दै लाभरोभले अमेरिकाको भूमिकाप्रति रूसले ध्यान दिइरहेको बताए। उनले अमेरिकी विदेशमन्त्री मार्को रुबियोले कांग्रेसमा दिएको अभिव्यक्तिलाई उल्लेख गर्दै अमेरिका युक्रेनको पक्षमा रहेको स्वीकार गरेको दाबी गरे।

लाभरोभका अनुसार राष्ट्रपति भ्लादिमिर पुटिन र अमेरिकी राष्ट्रपति डोनाल्ड ट्रम्पबीच टेलिफोन वार्तामा युक्रेन संकटलगायत विषयमा छलफल भएको थियो। उनले ट्रम्पले युक्रेन संकटको न्यायपूर्ण र दीर्घकालीन समाधान खोज्न सहयोग गर्ने चासो दोहोर्याएको बताए।

लाभरोभले अमेरिकाको २८ बुँदे योजनाबारे रूससँग अझै केही प्रश्न रहेको बताए। यद्यपि, अलास्का सहमति कार्यान्वयनमा आएको भए त्यसलाई आधारका रूपमा प्रयोग गर्न रूस तयार रहेको उनको भनाइ थियो।

उनले युरोपेली मुलुकहरूले यस प्रक्रियामा नकारात्मक भूमिका खेलेको आरोप लगाए। अलास्का शिखर बैठकपछि युरोपेली नेताहरूले वासिङ्टनमा सक्रियता बढाएर अमेरिकी राष्ट्रपतिले अघि सारेको र रूसी राष्ट्रपतिले समर्थन गरेको मार्गबाट अमेरिका पछि हटोस् भन्ने प्रयास गरेको लाभरोभको दाबी थियो।

लाभरोभले अमेरिकी प्रतिनिधिहरू स्टिभ विट्कोफ र जारेड कुशनर फेरि रूस आउने अपेक्षा गरिएको उल्लेख गर्दै अलास्का सहमति कार्यान्वयनको सम्भावनाबारे वासिङ्टनको धारणा स्पष्ट हुने आशा व्यक्त गरे।

उनले युक्रेन मुद्दा अमेरिकाको प्राथमिकताबाट हराउन नहुने बताए। राष्ट्रपति ट्रम्पको नेतृत्वमा अमेरिकाले केही उपयोगी पहलहरू अघि सारेको भन्दै लाभरोभले यो विषय युरोपेली मुलुकहरूको जिम्मामा मात्र छाडिन नहुने धारणा राखे।

लाभरोभले रूस मानवअधिकार र जनताको अधिकारका लागि लडिरहेको दाबी पनि गरे। उनले संयुक्त राष्ट्रसंघको बडापत्रको धारा १ मा उल्लेख गरिएअनुसार जाति, लिंग, भाषा वा धर्मका आधारमा भेदभाव नगरी सबै जनताको अधिकारको सम्मान हुनुपर्ने बताए।

वार्तापछि लाभरोभले बेलारूसी पक्षसँगको छलफलका नतिजाप्रति रूस अत्यन्त सन्तुष्ट रहेको र दुवै पक्षबीच निरन्तर सम्पर्क कायम रहने बताए।