क्यालिफोर्नियामा अमेरिकी वायुसेनाको बी–५२ विमान दुर्घटना, आठ जना सवार
क्यालिफोर्निया । अमेरिकी वायुसेनाको बी–५२ स्ट्राटोफोर्ट्रेस विमान सोमबार क्यालिफोर्नियास्थित एडवर्ड्स एयर फोर्स बेसबाट उडान भरेको केही समयमै दुर्घटनामा परेको छ।
क्यालिफोर्नियाको मोजावे मरुभूमि क्षेत्रमा भएको दुर्घटनामा विमानमा आठ जना सवार रहेको बेसले जनाएको छ। प्रारम्भिक संकेतअनुसार दुर्घटनाबाट जीवित उद्धार हुने सम्भावना नरहेको बेसले सामाजिक सञ्जाल एक्समार्फत जानकारी दिएको छ।
बेसका अनुसार विमान स्थानीय समयअनुसार बिहान ११ः२० बजे उडेको थियो। विमान नियमित परीक्षण मिसनमा रहेको जनाइएको छ।
दुर्घटनास्थलतर्फ आपतकालीन उद्धार टोली परिचालन गरिएको छ। अधिकारीहरूले विमानमा सवार सबै व्यक्तिको अवस्था यकिन गर्न प्रयास गरिरहेका छन्।
दुर्घटनाको कारणबारे अनुसन्धान जारी रहेको बेसले जनाएको छ।
घटनापछि एडवर्ड्स एयर फोर्स बेसको एयरफिल्ड बन्द गरिएको छ भने त्यहाँ आउँदै गरेका सबै विमानलाई अन्यत्र मोडिएको छ।
आपतकालीन प्रतिक्रिया कार्यलाई प्राथमिकता दिन गैर–व्यावसायिक आगन्तुक पासहरू अर्को सूचना नभएसम्मका लागि निलम्बन गरिएको बेसले जनाएको छ।
