चीन–म्यानमार सहकार्यलाई नयाँ गति दिने बेइजिङ वार्ता
काठमाडौँ। चिनियाँ प्रधानमन्त्री ली छ्याङले मंगलबार बेइजिङमा म्यानमारका राष्ट्रपति मिन आङ ह्लाइङसँग भेटवार्ता गरेका छन्। भेटमा दुई देशबीचको राजनीतिक विश्वास, विकास सहकार्य, सुरक्षा समन्वय र जनस्तरीय आदानप्रदानलाई थप सुदृढ बनाउने विषयमा छलफल भएको चिनियाँ पक्षले जनाएको छ।
प्रधानमन्त्री ली छ्याङले चीन र म्यानमार असल छिमेकी तथा मित्र भएको उल्लेख गर्दै चीनले म्यानमारले आफ्नै राष्ट्रिय अवस्थासुहाउँदो विकास मार्ग अवलम्बन गर्ने प्रयासलाई समर्थन गर्ने बताए। उनले नयाँ म्यानमार सरकारको शासन सञ्चालनप्रति चीनको दृढ समर्थन रहेको पनि बताए।
ली छ्याङका अनुसार चीन म्यानमारसँग मिलेर दुई देशका राष्ट्रप्रमुखहरूले दिएको रणनीतिक मार्गदर्शनअनुसार परम्परागत मित्रता अघि बढाउन, राजनीतिक आपसी विश्वास सुदृढ गर्न र पारस्परिक हितमा आधारित सहकार्य गहिरो बनाउन तयार छ। उनले द्विपक्षीय सम्बन्धको स्थिर प्रगतिले दुवै देशको आधुनिकीकरण अभियानलाई सहयोग पुर्याउने र क्षेत्रीय स्थायित्व तथा समृद्धिमा योगदान दिने धारणा राखे।
प्रधानमन्त्री लीले बेल्ट एन्ड रोड पहल (Belt and Road Initiative) अन्तर्गत उच्च गुणस्तरीय सहकार्य गहिरो बनाउने चीनको इच्छा व्यक्त गरे। उनले नवीकरणीय ऊर्जा, कृत्रिम बुद्धिमत्ता, डिजिटल अर्थतन्त्रलगायतका क्षेत्रमा सहकार्य विस्तार गर्न सकिने बताए। उनका अनुसार चीन र म्यानमार साझा विकासको बाटोमा हातेमालो गर्दै अघि बढ्नुपर्ने आवश्यकता छ।
सुरक्षा क्षेत्रमा पनि दुवै पक्षले सहकार्य बढाउनुपर्नेमा ली छ्याङले जोड दिए। उनले अनलाइन जुवा, दूरसञ्चार ठगीजस्ता सीमापार अपराध संयुक्त रूपमा निर्मूल गर्न र म्यानमारमा रहेका चिनियाँ नागरिक, संस्था तथा परियोजनाको सुरक्षालाई प्रभावकारी रूपमा सुनिश्चित गर्नुपर्ने बताए।
प्रधानमन्त्री लीले शिक्षा, संस्कृति, पर्यटन, युवा र स्वास्थ्य क्षेत्रमा पनि चीन म्यानमारसँग आदानप्रदान तथा सहकार्य गहिरो बनाउन तयार रहेको उल्लेख गरे। जटिल बन्दै गएको अन्तर्राष्ट्रिय परिस्थितिमा दुवै देशले बहुपक्षीय ढाँचाभित्र समन्वय बढाउँदै विकासशील देशहरूको साझा हित संरक्षण गर्नुपर्ने उनको भनाइ थियो।
उनले अझ न्यायपूर्ण र उचित विश्व शासन प्रणाली निर्माणका लागि चीन र म्यानमारले नजिकबाट सहकार्य गर्नुपर्ने बताए। लीका अनुसार क्षेत्रीय शान्ति, स्थायित्व र समृद्धिका लागि दुवै देशबीचको समन्वय महत्वपूर्ण छ।
म्यानमारका राष्ट्रपति मिन आङ ह्लाइङले म्यानमार एक चीन सिद्धान्तमा दृढ रहेको र ताइवान स्वतन्त्रताको विरोध गर्ने बताए। उनले म्यानमारको आर्थिक तथा सामाजिक विकासमा चीनले प्रदान गरेको सहयोगप्रति धन्यवाद व्यक्त गरे।
मिन आङ ह्लाइङले म्यानमार चीनसँग रणनीतिक समन्वय बढाउन, म्यानमार–चीन आर्थिक करिडोर अघि बढाउन र व्यापार, लगानीलगायतका क्षेत्रमा सहकार्य गहिरो बनाउन इच्छुक रहेको बताए। उनले जनस्तरीय तथा सांस्कृतिक आदानप्रदानलाई पनि थप विस्तार गर्ने प्रतिबद्धता व्यक्त गरे।
म्यानमार चीनसँग मिलेर सीमापार अपराधविरुद्ध दृढतापूर्वक कारबाही गर्न तयार रहेको पनि उनले बताए। मिन आङ ह्लाइङका अनुसार म्यानमारले चीनले प्रस्ताव गरेका चार प्रमुख विश्वव्यापी पहलहरूलाई पूर्ण समर्थन गर्दछ र क्षेत्रीय शान्ति, स्थायित्व, विकास तथा समृद्धि प्रवर्द्धनका लागि चीनसँग सञ्चार र सहकार्य बढाउन चाहन्छ।
बेइजिङमा भएको यो भेटलाई चीन–म्यानमार व्यापक रणनीतिक सहकार्य साझेदारीलाई थप उच्च स्तरमा लैजाने प्रयासका रूपमा प्रस्तुत गरिएको छ।
