रास्वपा सांसदमा अहंकार देखियो : रवीन्द्र मिश्र
काठमाडौं — राष्ट्रिय प्रजातन्त्र पार्टीका पूर्ववरिष्ठ नेता रवीन्द्र मिश्रले राष्ट्रिय स्वतन्त्र पार्टीका कतिपय सांसदमा अत्यधिक अहंकार देखिएको टिप्पणी गरेका छन्।
सामाजिक सञ्जाल फेसबुकमार्फत प्रतिक्रिया जनाउँदै मिश्रले रास्वपाका केही सांसदहरू बालेन शाहको लोकप्रियताको बलमा संसद्मा पुगेको दाबी गरे। उनले उनीहरूलाई अनावश्यक घमण्ड नगर्न सुझावसमेत दिएका छन्।
मिश्रले रास्वपाका एक सांसदले आफूलाई नभई बालेन शाहलाई बधाई दिन आग्रह गरेको प्रसंग उल्लेख गर्दै त्यसलाई विनम्रताको उदाहरणका रूपमा व्याख्या गरेका छन्। तर अर्का सांसदले आफू “जनताको मन जितेर आएको” बताएको प्रसंगलाई उनले अहंकारको संकेतका रूपमा प्रस्तुत गरेका छन्।
उनका अनुसार पहिलो प्रकारको व्यवहारमा विनयशीलता देखिए पनि दोस्रो प्रकारको प्रवृत्ति बढी देखिएको छ। मिश्रले यस्तो प्रवृत्ति राजनीतिक रूपमा हितकर नहुने टिप्पणी गरेका छन्।
“देख्दा, हेर्दा र सुन्दा जिउ नै गह्रौँ भएर यति लेखेँ। अहंकारीहरूलाई फाइदै होला,” मिश्रले फेसबुकमा लेखेका छन्।
