उन्डाभको दुई गोलमा जर्मनी नकआउट चरणमा
टोरन्टो । वैकल्पिक खेलाडी डेनिज उन्डाभले दुई गोल गरेपछि चारपटकको विश्व च्याम्पियन जर्मनीले कोट डी आइभोरलाई २–१ ले हराउँदै फिफा विश्वकप २०२६ को नकआउट चरणमा स्थान पक्का गरेको छ।
समूह चरणको दोस्रो खेलमा एक गोलले पछि परेको जर्मनीले उत्कृष्ट पुनरागमन गर्दै महत्वपूर्ण जित निकालेको हो। कोट डी आइभोरका कप्तान फ्रान्क केस्सीले पहिलो हाफमा गोल गर्दै अफ्रिकी टोलीलाई अग्रता दिलाएका थिए। त्यसपछि जर्मनी लामो समयसम्म बराबरी गोलको खोजीमा रह्यो।
दोस्रो हाफमा प्रशिक्षक युलियन नागेल्समानले बेन्चका खेलाडीलाई मैदानमा उतारेपछि जर्मनीको आक्रमण प्रभावकारी बन्यो। ६८औँ मिनेटमा नादिम अमिरीको क्रसलाई उन्डाभले गोलमा परिणत गर्दै खेल १–१ को बराबरीमा ल्याए।
खेल बराबरीतर्फ उन्मुख भइरहेका बेला उन्डाभले इन्जुरी समयको चौथो मिनेटमा निर्णायक गोल गरे। उनको दोस्रो गोलसँगै जर्मनीले २–१ को जित दर्ता गर्दै अन्तिम समूह खेलअघि नै राउन्ड अफ ३२ मा स्थान सुरक्षित गर्यो।
कोट डी आइभोरका लागि यो हार पीडादायी बन्यो। टोलीले दोस्रो हाफमा पनि केही अवसर सिर्जना गरे पनि सदुपयोग गर्न सकेन। यद्यपि, अन्तिम समूह खेलमा कुरासाओसँग प्रतिस्पर्धा गर्ने भएकाले कोट डी आइभोरको नकआउट सम्भावना अझै समाप्त भएको छैन।
यसअघि आफ्नो पहिलो खेलमा जर्मनीले कुरासाओलाई ७–१ ले पराजित गरेको थियो। उक्त खेलमा पनि उन्डाभले वैकल्पिक खेलाडीका रूपमा मैदान प्रवेश गर्दै एक गोल गर्नुका साथै दुई गोलका अवसर सिर्जना गरेका थिए।
लगातार दोस्रो खेलमा प्रभावशाली प्रदर्शन गरेका उन्डाभले जर्मनीका लागि महत्वपूर्ण ‘सुपर सब’को भूमिका निर्वाह गरेका छन्। उनको निर्णायक उपस्थितिले जर्मनीलाई समूह चरणमै बलियो स्थितिमा पुर्याएको छ।
