भारतले ब्रिक्स राष्ट्रिय सुरक्षा सल्लाहकारहरूको बैठक आयोजना गर्दै

नयाँ दिल्ली — भारतले सोमबारदेखि ब्रिक्स (BRICS) राष्ट्रहरूको राष्ट्रिय सुरक्षा सल्लाहकारहरूको बैठक आयोजना गर्दैछ। भारतको विदेश मन्त्रालयले बैठकको अध्यक्षता राष्ट्रिय सुरक्षा सल्लाहकार अजित डोभालले गर्ने जनाएको छ।

बैठकमा ब्रिक्स सदस्य राष्ट्रका राष्ट्रिय सुरक्षा सल्लाहकार तथा प्रतिनिधिमण्डल प्रमुखहरूले विश्वले सामना गरिरहेका परम्परागत तथा उदीयमान सुरक्षा चुनौतीहरूको बारेमा व्यापक छलफल गर्ने कार्यक्रम छ। विशेषगरी द्रुत रूपमा परिवर्तन भइरहेका सुरक्षा जोखिम र तिनीसँग सम्बन्धित नयाँ प्रविधिको भूमिकाको बारेमा विचार आदानप्रदान हुने मन्त्रालयले जनाएको छ।

बैठकमा आतंकवादविरुद्धको सहकार्य तथा सूचना एवं सञ्चार प्रविधिको सुरक्षित प्रयोगसम्बन्धी हालै सम्पन्न ब्रिक्स संयुक्त कार्य समूहका निष्कर्षहरूको समेत समीक्षा गरिने भएको छ।

भारतले यसअघि सन् २०१२, २०१६ र २०२१ मा ब्रिक्सको अध्यक्षता गरिसकेको छ। सन् २०२६ मा भारतले चौथो पटक ब्रिक्सको अध्यक्षता गरिरहेको छ। यस वर्षको भारतीय अध्यक्षता ‘समावेशिता, नवप्रवर्तन, सहयोग र दिगोपनका लागि निर्माण’ भन्ने मूल विषयवस्तुमा केन्द्रित रहेको मन्त्रालयले जनाएको छ।

ब्रिक्स सहकार्यले आतंकवादविरुद्धको अभियान, जलवायु परिवर्तन, खाद्य तथा ऊर्जा सुरक्षा, अन्तर्राष्ट्रिय आर्थिक तथा वित्तीय व्यवस्था, दूरसञ्चार, कृषि, श्रम तथा रोजगारी, व्यापार र विश्व व्यापार संगठन (WTO) लगायतका विविध क्षेत्रमा सक्रिय भूमिका निर्वाह गर्दै आएको मन्त्रालयले जनाएको छ।

यस बैठकले ब्रिक्स राष्ट्रहरूबीच सुरक्षा साझेदारी थप सुदृढ गर्न र वैश्विक सुरक्षा चुनौतीहरूको सामना गर्न साझा रणनीति तर्जुमा गर्न महत्वपूर्ण कोशेढुङ्गा साबित हुने विश्वास गरिएको छ।