सरकारको कारबाही तीव्र : विष्णु पौडेलपछि जनार्दन शर्मालाई पनि पक्राउ गर्ने तयारी
काठमाडौँ — सरकारले एकपछि अर्को पूर्व अर्थमन्त्रीलाई अनुसन्धानको दायरामा ल्याउने तयारी गरेको छ। सोमबार ६ पटक अर्थमन्त्री भइसकेका नेकपा एमालेका उपाध्यक्ष विष्णु पौडेललाई सम्पत्ति शुद्धीकरण सम्बन्धी कसुरको अनुसन्धानका लागि सुर्खेतबाट पक्राउ गरिएको थियो। लगत्तै अब अर्का पूर्व अर्थमन्त्री एवं नेकपा माओवादी केन्द्रका नेता जनार्दन शर्मालाई पनि पक्राउ गर्ने तयारी भएको उच्च प्रहरी स्रोतले जानकारी दिएको छ।
प्रहरी स्रोतका अनुसार शर्मामाथि पृथ्वीबहादुर शाहले अमेरिकाबाट ल्याएको ४० करोड रुपैयाँ स्रोत नखुलेको रकम छुटाउन राष्ट्र बैंकलाई पत्राचार गरेको घटनामा अनुसन्धान गर्ने सम्भावना रहेको छ। शर्मा अर्थमन्त्री रहेका बेला शाहले विदेशबाट ल्याएको उक्त रकम फुकुवा गरिदिन तत्कालीन अर्थमन्त्री शर्माले राष्ट्र बैंकलाई लिखित निर्देशन दिएका थिए।
तत्कालीन गभर्नर महाप्रसाद अधिकारीले स्रोत नखुलेको ठूलो रकम छोड्न अस्वीकार गरेपछि दुईबीच गम्भीर टकराव भएको थियो। सोही विषयलाई लिएर तत्कालीन अर्थमन्त्री शर्माले अधिकारीलाई पदबाट समेत हटाएका थिए। तर, सर्वोच्च अदालतको आदेशपछि अधिकारी पदमा पुनर्बहाली हुन सफल भएका थिए।
स्रोतका अनुसार, अब उक्त प्रकरणमा सम्पत्ति शुद्धीकरण सम्बन्धी कसुरमा समेत शर्मालाई अनुसन्धानको दायरामा ल्याउने तयारी भइरहेको छ। विष्णु पौडेलको पक्राउपछि लगत्तै शर्मालाई पनि पक्राउ गर्ने तयारीले सरकारले उच्चस्तरीय भ्रष्टाचार र वित्तीय अनियमितताविरुद्ध कडा कदम चाल्न थालेको सङ्केत देखिन्छ। यस घटनाक्रमले नेपालको राजनीतिक वृत्तमा ठूलो हलचल ल्याएको छ।
