फिफा विश्वकप : पोर्चुगलको उज्वेकिस्तानमाथि ५–० को सानदार जित, रोनाल्डो नायक
फिफा विश्वकप प्रतियोगिताअन्तर्गत समूह ‘के’ को आफ्नो दोस्रो खेलमा पोर्चुगलले उज्वेकिस्तानलाई ५–० गोलअन्तरले पराजित गर्दै सानदार जित हात पारेको छ । पोर्चुगलको यस ऐतिहासिक जितमा क्रिस्टियानो रोनाल्डो नायक बने, जसले दुई गोल गर्दै टोलीलाई विजयतर्फ डोर्याए ।
खेलको छैटौँ मिनेटमै कर्नरबाट आएको बललाई रोनाल्डोले जाली चुमाउँदै पोर्चुगललाई प्रारम्भिक अग्रता दिलाए । त्यसको ११ मिनेटपछि अर्थात् १७औँ मिनेटमा नुनो मेन्डेसले गोल गर्दै टोलीको अग्रता दोब्बर बनाए ।
३९औँ मिनेटमा रोनाल्डोले व्यक्तिगत दोस्रो गोल थप्दा पोर्चुगल खेलको पहिलो हाफमै ३–० को सहज अवस्थामा पुग्यो । दोस्रो हाफमा पनि पोर्चुगलको आक्रमण जारी रह्यो — ६०औँ मिनेटमा अब्दवोहिद नेमातोवले र ८७औँ मिनेटमा राफाएल लीओले थप एक–एक गोल गर्दै खेलको अन्तिम परिणाम ५–० कायम गरे ।
जितसँगै पोर्चुगल समूह ‘के’ को अङ्क तालिकामा चार अङ्कका साथ शीर्ष स्थानमा उक्लिएको छ । पहिलो खेलमा कङ्गोसँग बराबरी गरेको पोर्चुगलका लागि यो दोस्रो खेलको जितले अघिल्लो चरण पुग्ने सम्भावना उज्ज्वल बनाएको छ । लगातार दोस्रो हार बेहोरेको उज्वेकिस्तान भने अङ्क तालिकाको पुछारमा रहेको छ ।
यसैबीच, विश्वकप प्रतियोगिताअन्तर्गत आजको खेल तालिका पनि रोमाञ्चक रहेको छ । आज दिउँसो १ः४५ बजे इङ्ल्याण्ड र घानाबीच भिडन्त हुँदैछ भने बिहान ४ः४५ बजे पानामा र क्रोएसियाबीच खेल हुनेछ । त्यसैगरी, बिहान ७ः४५ बजे कोलम्बिया र कङ्गोबीच प्रतिस्पर्धा हुनेछ ।
