विष्णु पौडेल रिहाइको माग गर्दै सर्वोच्चमा बन्दी प्रत्यक्षीकरण रिट
काठमाडौँ — नेकपा एमालेका उपाध्यक्ष विष्णु पौडेललाई गैरकानुनी रूपमा थुनामा राखिएको दाबी गर्दै सर्वोच्च अदालतमा बन्दी प्रत्यक्षीकरणको रिट परेको छ।
पौडेलकी पत्नीले उनको रिहाइको माग गर्दै आज सर्वोच्चमा रिट निवेदन दायर गरेकी हुन्। सर्वोच्च अदालतका सहायक प्रवक्ता तथा उपरजिस्ट्रार निराजन पाण्डेका अनुसार रिट अदालतमा परेको छ र दर्ताको प्रक्रियामा रहेको छ।
“रिट परेको छ, दर्ता हुने क्रममा छ,” पाण्डेले बताए।
सम्पत्ति शुद्धीकरणसम्बन्धी कसुरमा पौडेललाई अस्ति सुर्खेतबाट पक्राउ गरिएको थियो। पक्राउपछि उनलाई अनुसन्धानका लागि सात दिन हिरासतमा राख्न विशेष अदालतले प्रहरीलाई अनुमति दिएको थियो।
पौडेल हाल प्रहरी प्रभाग, पुल्चोकको हिरासतमा छन्।
बन्दी प्रत्यक्षीकरण रिट सामान्यतया कुनै व्यक्तिलाई गैरकानुनी रूपमा थुनामा राखिएको दाबी गर्दै तत्काल अदालतसमक्ष उपस्थित गराउन र थुनाको वैधता परीक्षण गर्न दायर गरिन्छ। सर्वोच्च अदालतले रिट दर्ता गरेपछि यसमाथि प्रारम्भिक सुनुवाइ हुने अपेक्षा गरिएको छ।
