पेपेका दुई गोलमा आइभोरी कोस्ट विश्वकपको अन्तिम ३२ मा, क्युरासाओको यात्रा समाप्त
काठमाडौँ — निकोलस पेपेको दुई गोलको मद्दतमा क्युरासाओलाई पराजित गर्दै आइभोरी कोस्टले आफ्नो फुटबल इतिहासमै पहिलो पटक फिफा विश्वकपको नकआउट चरण अर्थात् अन्तिम ३२ मा स्थान सुरक्षित गरेको छ।
यसअघिका तीन विश्वकप सहभागितामा समूह चरणबाटै बाहिरिएको आइभोरी कोस्टका लागि यो उपलब्धि ऐतिहासिक बनेको छ। समूह ‘ई’ को निर्णायक खेलमा आइभोरी कोस्टलाई नकआउट चरणमा पुग्न एक अंक मात्र आवश्यक थियो। तर टोलीले सुरुदेखि नै आक्रामक खेल प्रस्तुत गर्यो।
खेलको सातौँ मिनेटमै क्युरासाओका डिफेन्डरको गल्तीको फाइदा उठाउँदै यान डियोमान्डेले बल खोसेका थिए। त्यसपछि प्राप्त अवसरलाई निकोलस पेपेले गोलमा परिणत गर्दै आइभोरी कोस्टलाई सुरुवाती अग्रता दिलाए।
पूर्व आर्सनल फरवार्ड पेपेले खेलको ६५औँ मिनेटमा व्यक्तिगत दोस्रो गोल गरे। उनको बायाँ खुट्टाको उत्कृष्ट प्रहार क्युरासाओका गोलकिपर इलोय रुमलाई छक्याउँदै पोस्टको माथिल्लो कुनामा पुगेको थियो।
यो जितसँगै आइभोरी कोस्टले समूह ‘ई’ मा ६ अंक जोड्दै दोस्रो स्थान हासिल गर्यो। विश्वकपको एउटै संस्करणमा आइभोरी कोस्टले दुई खेल जितेको यो पहिलो अवसर पनि हो।
ऐतिहासिक जितपछि मुख्य प्रशिक्षक इमर्स फाएले समर्थकहरूलाई यो उपलब्धिको खुसी मनाउन आग्रह गरे। उनले टोलीभित्र बलियो एकता र स्वस्थ प्रतिस्पर्धा रहेको बताए।
जनसंख्याका आधारमा पुरुष विश्वकप खेल्ने सबैभन्दा सानो राष्ट्र क्युरासाओ भने पराजयसँगै प्रतियोगिताबाट बाहिरिएको छ। यद्यपि उसले प्रतियोगितामा साहसिक प्रदर्शन गरेको थियो। पहिलो हाफको अन्त्यतिर जुनिन्हो बाकुनाले गोल गर्ने राम्रो अवसर गुमाएका थिए।
यसअघि इक्वेडरसँग ऐतिहासिक बराबरी खेल्दै पहिलो अंक जोडेको क्युरासाओले पराजयका बाबजुद आफ्नो साख बढाएर विश्वकप यात्रा समाप्त गरेको छ।
आइभोरी कोस्टको यो सफलता डिडिएर ड्रोग्बा र याया टुरेजस्ता ‘स्वर्णिम पुस्ता’ का दिग्गज खेलाडीका लागि पनि गर्वको विषय बनेको छ। सन् २००६ मा अर्जेन्टिना र नेदरल्यान्ड्सजस्ता बलिया टोली रहेको समूहमा पर्नु, २०१० मा पोर्चुगल र ब्राजिलसँग भिड्नु र २०१४ मा ग्रीससँग अन्तिम समयमा गोल खाएर बाहिरिनु आइभोरी कोस्टका लागि पीडादायी इतिहास थियो।
तर यसपटक नयाँ पुस्ताले त्यो इतिहास चिर्दै आइभोरी कोस्टलाई विश्वकपको नकआउट चरणमा पुर्याएको छ। यो जितले टोलीका समर्थकहरूलाई लामो समयपछि ठूलो उत्सव मनाउने अवसर दिएको छ।
