मोल्दोभाका राजदूतलाई रुसी विदेश मन्त्रालयमा बोलाएर विरोधपत्र
मस्को । रुसले मोल्दोभाका राजदूत लिलियन दारीलाई विदेश मन्त्रालयमा बोलाएर कडा विरोध जनाएको छ। रुसी विदेश मन्त्रालयका अनुसार जुन २६ मा मोल्दोभाका राजदूतलाई मन्त्रालयमा बोलाई सन् १९६१ को कूटनीतिक सम्बन्धसम्बन्धी भियना महासन्धिका आधारभूत प्रावधानको गम्भीर उल्लङ्घन भएको भन्दै विरोधपत्र हस्तान्तरण गरिएको हो।
रुसी पक्षका अनुसार जुन २५ मा चिसिनाउ विमानस्थलमा रुसी विदेश मन्त्रालयका कूटनीतिक कुरियरहरूलाई घण्टौँसम्म रोकेर राखिएको थियो। उनीहरूमाथि कूटनीतिक पत्राचार निरीक्षण गर्न र आफ्ना मोबाइल सञ्चार उपकरण “स्वेच्छाले” बुझाउनुपर्ने अवैध र अस्वीकार्य माग राखिएको रुसले आरोप लगाएको छ।
रुसी विदेश मन्त्रालयले मोल्दोभास्थित रुसी दूतावासका कूटनीतिज्ञहरूलाई पनि विमानस्थलको प्रतिबन्धित क्षेत्रमा प्रवेश गर्न नदिइएको जनाएको छ। मन्त्रालयका अनुसार उनीहरू त्यहाँ पुगेका रुसी विदेश मन्त्रालयका अधिकारीहरूलाई कन्सुलर सहायता उपलब्ध गराउन चाहन्थे।
रुसी पक्षले कूटनीतिक कुरियरहरूको आगमनबारे मोल्दोभालाई पूर्वजानकारी गराइएको दाबी गरेको छ। तर घटनापछि उनीहरू मोल्दोभा प्रवेश गर्न नसकी स्वदेश फर्किन बाध्य भएको रुसी विदेश मन्त्रालयले जनाएको छ।
मस्कोले उक्त घटनालाई सन् १९६१ को भियना महासन्धिको धारा २७ को गम्भीर उल्लङ्घन भनेको छ। उक्त धाराअनुसार कूटनीतिक कुरियरले व्यक्तिगत अभेद्यता उपभोग गर्ने र उनीहरूलाई कुनै पनि प्रकारको पक्राउ वा नियन्त्रणमा राख्न नमिल्ने व्यवस्था छ। त्यस्तै, कूटनीतिक थैलो खोल्न वा रोक्न नमिल्ने व्यवस्था पनि सोही धारामा उल्लेख छ।
रुसी विदेश मन्त्रालयले मोल्दोभाको कदम कूटनीतिक मर्यादा र अन्तर्राष्ट्रिय कानुनी दायित्वविपरीत भएको भन्दै यसप्रति कडा आपत्ति जनाएको छ।
