गण्डकी प्रदेशस्तरीय महिला टी ट्वान्टी क्रिकेट सुरु, उद्घाटन खेलमा स्याङ्जाको फराकिलो जित
पोखरामा आजदेखि तेस्रो संस्करणको गण्डकी प्रदेशस्तरीय महिला टी ट्वान्टी क्रिकेट प्रतियोगिता सुरु भएको छ। महिला क्रिकेटको विकास र नयाँ खेलाडी उत्पादन गर्ने उद्देश्यले प्रादेशिक क्रिकेट सङ्घ गण्डकीको आयोजनामा तथा प्रदेश खेलकुद परिषद् गण्डकीको सहकार्यमा प्रतियोगिता सुरु भएको हो।
पोखरा रङ्गशालास्थित क्रिकेट मैदानमा भएको उद्घाटन खेलमा स्याङ्जाले नवलपुरलाई ९६ रनको फराकिलो अन्तरले पराजित गर्दै विजयी सुरुआत गरेको छ।
टस जितेर पहिले ब्याटिङ गरेको स्याङ्जाले निर्धारित २० ओभरमा आठ विकेट गुमाउँदै १२७ रनको प्रतिस्पर्धात्मक योगफल तयार पारेको थियो। स्याङ्जाका लागि सलिना सेनले सर्वाधिक ४० रनको योगदान दिइन्। अरमिना अधिकारीले ३० रन जोडिन् भने सिमाना केसीले १२ रन बनाइन्। रञ्जना साउद पाँच रन र अन्तिमा विश्वकर्मा छ रनमा अविजित रहे। स्याङ्जाले अतिरिक्तबाट मात्र २७ रन प्राप्त गरेको थियो।
नवलपुरका बलरमध्ये श्रेया शर्माले उत्कृष्ट प्रदर्शन गर्दै चार ओभरमा २५ रन खर्चेर तीन विकेट लिइन्। निहारिका शर्माले दुई तथा आयुष्मा चापागाईंले एक विकेट हात पारिन्।
जितका लागि १२८ रनको लक्ष्य पछ्याएको नवलपुर नौ ओभरको पाँचौँ बलमा ३१ रनमै समेटियो। नवलपुरका कुनै पनि ब्याटरले दोहोरो अङ्क बनाउन सकेनन्। अतिरिक्तबाट प्राप्त १४ रन नै टोलीका लागि सबैभन्दा ठूलो योगदान बन्यो।
स्याङ्जाको सहज जितमा सिमाना केसी र निरु जीटीले समान तीन तीन विकेट लिए। कुसुम गोदारले दुई तथा रञ्जना साउदले एक विकेट हात पारिन्। ब्याटिङमा १२ रन र बलिङमा तीन विकेटसहित उत्कृष्ट अलराउन्ड प्रदर्शन गरेकी सिमाना केसी उद्घाटन खेलको प्लेयर अफ द म्याच घोषित भइन्।
प्रतियोगितामा कास्की, स्याङ्जा, नवलपुर, बागलुङ र पर्वतका पाँच टोली सहभागी छन्। प्रतियोगिता राउन्ड रोबिन लिग प्रणालीमा सञ्चालन हुने आयोजक गण्डकी प्रादेशिक क्रिकेट सङ्घका अध्यक्ष सञ्जयकान्त सिग्देलले बताए।
अध्यक्ष सिग्देलले महिला क्रिकेटको स्तर उकास्दै प्रतिभावान् खेलाडी उत्पादन गर्ने उद्देश्यले प्रतियोगिता आयोजना गरिएको बताए। उनका अनुसार प्रतियोगिताले महिला क्रिकेटको प्रवर्द्धन, खेलाडीको क्षमता अभिवृद्धि र नयाँ प्रतिभा पहिचानमा सहयोग पुर्याउनेछ।
यसअघि प्रदेश खेलकुद परिषद् गण्डकीका सदस्य रवीन्द्रबहादुर प्रजुले प्रतियोगिताको उद्घाटन गरेका थिए। उद्घाटन कार्यक्रममा बोल्दै उनले खेलकुद क्षेत्रको बजेट घट्दै जानु चिन्ताको विषय भएको बताए। उनले खेलाडीलाई अनुशासित, प्रतिस्पर्धी र खेलभावनासहित उत्कृष्ट प्रदर्शन गर्न आग्रह गरे।
प्रतियोगिता यही असार १७ गतेसम्म सञ्चालन हुनेछ।
