इन्धनको मूल्यमा ठूलो कटौती, पेट्रोल २० र डिजेल ३० रुपैयाँ सस्तो
ड्रागन मिडिया संवाददाता
काठमाडौँ
नेपाल आयल निगमले पेट्रोलियम पदार्थको मूल्यमा ठूलो कटौती गरेको छ। निगमले पेट्रोलमा प्रतिलिटर २० रुपैयाँ, डिजेल र मट्टितेलमा प्रतिलिटर ३० रुपैयाँ तथा खाना पकाउने एलपी ग्यासमा प्रतिसिलिन्डर १०० रुपैयाँ मूल्य घटाएको हो।
निगमका अनुसार नयाँ मूल्य २०८३ असार १७ गते बिहान १२ बजेर १ मिनेटदेखि लागू हुनेछ। निगम सञ्चालक समितिको २०८३ असार १६ गते बसेको बैठकले मूल्य घटाउने निर्णय गरेको हो।
निगमले पछिल्लो समय अन्तर्राष्ट्रिय बजारमा पेट्रोलियम पदार्थको मूल्यमा आएको उतारचढावका कारण स्वचालित मूल्य प्रणालीअनुसार मूल्य समायोजन हुन नसकेको जनाएको छ। हाल अन्तर्राष्ट्रिय बजार मूल्यमा सुधार आएको र इन्डियन आयल कर्पोरेशनबाट प्राप्त नयाँ खरिद मूल्यका आधारमा उपभोक्ता मूल्य घटाइएको निगमको भनाइ छ।
नयाँ मूल्यअनुसार पहिलो वर्गअन्तर्गत पर्ने चारआली, विराटनगर, जनकपुर, अमलेखगन्ज, भलवारी, नेपालगन्ज, धनगढी र वीरगन्ज क्षेत्रमा पेट्रोलको मूल्य प्रतिलिटर १९४ रुपैयाँ ५० पैसा कायम भएको छ। यसअघि यी क्षेत्रमा पेट्रोल प्रतिलिटर २१४ रुपैयाँ ५० पैसा थियो।
दोस्रो वर्गअन्तर्गत सुर्खेत र दाङ क्षेत्रमा पेट्रोल प्रतिलिटर १९६ रुपैयाँ कायम भएको छ। यसअघि त्यहाँ पेट्रोलको मूल्य प्रतिलिटर २१६ रुपैयाँ थियो। तेस्रो वर्गअन्तर्गत काठमाडौँ, पोखरा र दिपायल क्षेत्रमा पेट्रोल प्रतिलिटर १९७ रुपैयाँ कायम भएको छ। यसअघि यी क्षेत्रमा पेट्रोल प्रतिलिटर २१७ रुपैयाँ थियो।
डिजेल र मट्टितेलको मूल्य पहिलो वर्गका क्षेत्रमा प्रतिलिटर १९२ रुपैयाँ ५० पैसा कायम गरिएको छ। यसअघि यी क्षेत्रमा डिजेल र मट्टितेल प्रतिलिटर २२२ रुपैयाँ ५० पैसा थियो।
दोस्रो वर्गअन्तर्गत सुर्खेत र दाङ क्षेत्रमा डिजेल तथा मट्टितेल प्रतिलिटर १९४ रुपैयाँ कायम भएको छ। तेस्रो वर्गअन्तर्गत काठमाडौँ, पोखरा र दिपायल क्षेत्रमा डिजेल तथा मट्टितेल प्रतिलिटर १९५ रुपैयाँ कायम भएको छ।
निगमले हवाई इन्धन आन्तरिकतर्फ पनि मूल्य घटाएको छ। आन्तरिक हवाई इन्धनको मूल्य प्रतिलिटर २२९ रुपैयाँ कायम गरिएको छ। यसअघि यसको मूल्य प्रतिलिटर २६९ रुपैयाँ थियो।
खाना पकाउने एलपी ग्यासको मूल्य प्रतिसिलिन्डर १०० रुपैयाँ घटाएर २ हजार ६० रुपैयाँ कायम गरिएको छ। यसअघि ग्यासको मूल्य प्रतिसिलिन्डर २ हजार १ सय ६० रुपैयाँ थियो।
हवाई इन्धन अन्तर्राष्ट्रिय उडानतर्फ काठमाडौँ, पोखरा र भैरहवाका लागि छुट्टाछुट्टै दर कायम गरिएको छ। निगमका अनुसार अन्तर्राष्ट्रिय हवाई इन्धनतर्फ पोखरा र भैरहवाका लागि ब्रेकइभन प्वाइन्टमा बिक्री मूल्य कायम गरिएको छ।
निगमले नयाँ मूल्य निगमका डिपो तथा कार्यालयदेखि १५ किलोमिटर क्षेत्रभित्र लागू हुने जनाएको छ। निगमले भौगोलिक अवस्थाका आधारमा इन्धनको मूल्य तीन वर्गमा विभाजन गर्दै आएको छ।
इन्धन मूल्यमा भएको कटौतीसँगै सार्वजनिक यातायात, ढुवानी, उद्योग, निर्माण र दैनिक उपभोग्य वस्तुको लागतमा राहत पुग्ने अपेक्षा गरिएको छ। पेट्रोल, डिजेल र ग्यासको मूल्य घट्दा उपभोक्तामाथिको तत्कालीन खर्च दबाब केही कम हुने देखिएको छ।
निगमले अन्तर्राष्ट्रिय बजार मूल्य, भारतीय आयल कर्पोरेशनबाट प्राप्त खरिद मूल्य र स्वचालित मूल्य प्रणालीका आधारमा पेट्रोलियम पदार्थको मूल्य समायोजन गरिएको जनाएको छ।
