कांग्रेस विवाद समाधानका लागि इतर समूहद्वारा सातबुँदे प्रस्तावमा लिखित जवाफकांग्रेस विवाद समाधानका लागि इतर समूहद्वारा सातबुँदे प्रस्तावमा लिखित जवाफ

ड्रागन मिडिया संवाददाता
काठमाडौं

नेपाली कांग्रेसभित्र देखिएको आन्तरिक विवाद समाधानका लागि इतर समूहले उपसभापति विश्वप्रकाश शर्माले अघि सारेको सातबुँदे प्रस्तावमा लिखित जवाफ पठाएको छ।

नेता पूर्णबहादुर खड्काले जेठ २२ गते उपसभापति शर्मासँग भेटेर आफ्नो पक्षका सर्त र एजेन्डा राखेका थिए। त्यसयता दुवै पक्षबीच थप औपचारिक छलफल नभए पनि इतर समूहले लिखित रूपमा आफ्नो धारणा पठाएको हो।

इतर समूहले पार्टी सदस्यताको डिजिटल अद्यावधिकलाई निरन्तरता दिने विषयमा सकारात्मक प्रतिक्रिया दिएको छ। तर डिजिटल अद्यावधिक नगर्ने सदस्यलाई महाधिवेशनमा भाग लिन नदिने व्यवस्था गर्न नहुने अडान राखेको छ। सदस्यता व्यवस्थापनलाई व्यवस्थित बनाउने नाममा महाधिवेशन प्रतिनिधित्वको अधिकार संकुचित गर्न नहुने इतर समूहको भनाइ छ।

लिखित जवाफमा १४औँ महाधिवेशन र विशेष महाधिवेशनबाट बनेका दुवै केन्द्रीय कार्यसमितिलाई समायोजन गर्नुपर्ने प्रस्ताव गरिएको छ। दुवै संरचनामा रहेका नेताहरूलाई मिलाएर पार्टीको केन्द्रीय कार्यसमितिलाई पूर्णता दिनुपर्ने र पदाधिकारी तथा सदस्यहरूको मर्यादाक्रम विगतको परम्पराअनुसार कायम गर्नुपर्ने इतर समूहको प्रस्ताव छ।

प्रस्तावमा भनिएको छ, “दुवै कार्यसमितिमा रहेका साथीहरूलाई मिलाएर पार्टीको केन्द्रीय कार्यसमितिलाई पूर्णता दिने तथा पदाधिकारी र सदस्यको परम्पराअनुसार मर्यादाक्रम कायम गर्ने।”

इतर समूहले १५औँ महाधिवेशन तयारीका लागि गठन हुने सबै समितिहरू दुवै पक्षको सहमतिमा गठन गर्नुपर्ने माग गरेको छ। विधान संशोधन, क्रियाशील सदस्यता व्यवस्थापन, निर्वाचन, अनुशासन, लेखा, व्यवस्थापन र प्रचारप्रसारलगायतका समितिमा दुवै पक्षको सहमति अनिवार्य हुनुपर्ने उसको अडान छ।

त्यस्तै भ्रातृ तथा शुभेच्छुक संस्थाहरूको गठन र पुनर्गठन पनि विगतको अभ्यासअनुसार सहमतिका आधारमा गर्नुपर्ने प्रस्ताव गरिएको छ। पार्टीभित्र संस्थागत सन्तुलन कायम राख्न भ्रातृ तथा शुभेच्छुक संस्थाहरूमा एकपक्षीय निर्णय नगर्न इतर समूहले आग्रह गरेको छ।

१५औँ महाधिवेशनको तयारीलाई व्यवस्थित बनाउन, संगठन विस्तार गर्न र लोकतान्त्रिक पद्धति तथा नागरिकका सवालमा राष्ट्रिय अभियान सञ्चालन गर्नुपर्ने माग पनि इतर समूहले अघि सारेको छ। पार्टीलाई आन्तरिक विवादबाट बाहिर निकालेर संगठन, विचार र जनसरोकारका मुद्दामा केन्द्रित गर्नुपर्ने उसको धारणा छ।

यतिबेला कांग्रेस महामन्त्री गुरुप्रसाद घिमिरेले पार्टी एकताका लागि नेताहरू पूर्णबहादुर खड्का, डा. शेखर कोइराला र कृष्णप्रसाद सिटौलासँग भेटघाट तथा छलफल गरिरहेका छन्। पार्टीभित्र देखिएको विवाद समाधान गर्न शीर्ष नेताहरूबीच सहमतिको प्रयास जारी रहेको बताइएको छ।

कांग्रेसभित्र महाधिवेशन तयारी, सदस्यता अद्यावधिक, केन्द्रीय कार्यसमिति समायोजन, भ्रातृ संस्था व्यवस्थापन र आन्तरिक शक्ति सन्तुलनका विषयमा लामो समयदेखि मतभेद देखिँदै आएको छ। इतर समूहको लिखित जवाफपछि अब उपसभापति शर्माको प्रस्ताव र इतर समूहको सर्तबीच सहमति खोज्ने प्रक्रिया अघि बढ्ने अपेक्षा गरिएको छ।

आन्तरिक विवाद समाधानका लागि दुवै पक्ष लचिलो बने मात्र कांग्रेसको संगठनात्मक अन्योल कम हुने नेताहरूको बुझाइ छ। आगामी महाधिवेशनको तयारी अघि बढाउन पार्टीभित्र विश्वास निर्माण, सहमतिमा समिति गठन र सदस्यता व्यवस्थापनलाई पारदर्शी बनाउनु कांग्रेसका लागि तत्कालीन चुनौती देखिएको छ।