जातीय विषय उछालेर आन्तरिक मामिलामा हस्तक्षेप नगर्न अमेरिका र ईयूलाई चीनको आग्रह
बेइजिङ । चीनले आफ्नो जातीय नीति र नयाँ कानुनबारे तथ्यहीन सूचना फैलाउँदै आन्तरिक मामिलामा हस्तक्षेप नगर्न संयुक्त राज्य अमेरिका र युरोपेली संघलाई आग्रह गरेको छ।
चिनियाँ विदेश मन्त्रालयका प्रवक्ता गुओ जियाकुनले शुक्रबार बेइजिङमा आयोजित नियमित पत्रकार सम्मेलनमा चीनको जातीय एकता तथा प्रगति प्रवर्द्धन कानुनबारे अमेरिका र युरोपेली संघले व्यक्त गरेको भनिएको चिन्ताप्रति प्रतिक्रिया जनाउँदै यस्तो बताएका हुन्।
चीनको जातीय एकता तथा प्रगति प्रवर्द्धन कानुन जुलाई १ देखि कार्यान्वयनमा आएको छ। उक्त कानुन चीनको राष्ट्रिय जनकंग्रेसले मार्चमा पारित गरेको थियो। कानुनले जातीय मामिलाको कानुनमा आधारित व्यवस्थापन, सबै जातीय समूहको समानता, साझा विकास, सांस्कृतिक संरक्षण तथा आपसी सम्पर्क र एकतालाई संस्थागत गर्ने लक्ष्य राखेको चिनियाँ अधिकारीहरूले बताएका छन्।
सञ्चारमाध्यमका विवरणअनुसार अमेरिका र युरोपेली संघले नयाँ कानुनले चीनका अल्पसङ्ख्यक जातीय समुदायको भाषा, संस्कृति र पहिचानमा पार्न सक्ने प्रभावबारे चिन्ता व्यक्त गरेका थिए।
प्रवक्ता गुओले सम्बन्धित देशहरूले पूर्वाग्रही दृष्टिकोणबाट चीनको जातीय नीतिलाई दुर्भावनापूर्ण रूपमा बदनाम गर्दै भ्रामक सूचना सिर्जना र प्रसार गरेको आरोप लगाए।
उनले भने, “सम्बन्धित देशहरूले चीनको जातीय नीतिलाई पूर्वाग्रही रूपमा हेरेर दुर्भावनापूर्ण बदनाम गरेका छन्। उनीहरूले तथ्यहीन सूचना सिर्जना र प्रसार गर्दै चीनको आन्तरिक मामिलामा खुला हस्तक्षेप गर्नुका साथै जातीय एकतालाई कमजोर बनाउने प्रयास गरेका छन्। चीन यसको दृढ विरोध गर्छ।”
गुओका अनुसार चीन बहुजातीय राष्ट्र हो र देशका सबै जातीय समूह कानुनअन्तर्गत समान छन्। विभिन्न जातीय समूहबीच एकता, सद्भाव र पारस्परिक सहयोगको सम्बन्ध कायम रहेको उनको भनाइ थियो।
उनले जातीय मामिलामा कानुनी शासन सुदृढ गर्दा सबै जातीय समूहका वैधानिक अधिकार र हितको थप प्रभावकारी संरक्षण हुने तथा राष्ट्रिय एकता बलियो बन्ने बताए।
चिनियाँ सरकारले अल्पसङ्ख्यक जातीय समुदायका संस्कृति संरक्षणलाई उच्च प्राथमिकता दिएको उल्लेख गर्दै उनले सबै जातीय समूहलाई आफ्ना मौखिक तथा लिखित भाषा प्रयोग, संरक्षण र विकास गर्ने अधिकार कानुनअनुसार सुनिश्चित गरिएको बताए।
गुओले चीनले जातीय क्षेत्रको आर्थिक तथा सामाजिक विकास, शिक्षा, स्वास्थ्य, सांस्कृतिक संरक्षण र नागरिक अधिकारका क्षेत्रमा हासिल गरेका उपलब्धिलाई अन्तर्राष्ट्रिय समुदायका धेरै पक्षले स्वीकार गरेको दाबी गरे।
उनले केही देशले वैचारिक पूर्वाग्रह र राजनीतिक उद्देश्यका कारण चीनको आर्थिक तथा सामाजिक प्रगति र मानवअधिकार संरक्षणका उपलब्धिलाई बेवास्ता गर्दै सन्दर्भबाट अलग तथ्य प्रस्तुत गरेको आरोप लगाए।
“उनीहरूले चीनको जातीय नीतिलाई बदनाम गर्न गलत सूचना फैलाएका छन् र चीनको आन्तरिक मामिलामा गम्भीर हस्तक्षेप गरेर देशको जातीय एकता कमजोर बनाउने प्रयास गरेका छन्,” गुओले भने।
चीनले जातीय मामिला पूर्ण रूपमा आफ्नो आन्तरिक विषय भएको दोहोर्याउँदै अमेरिका र युरोपेली संघलाई तथाकथित जातीय मुद्दा राजनीतिक रूपमा उछाल्न, भ्रामक सूचना फैलाउन र चीनको आन्तरिक मामिलामा हस्तक्षेप गर्न बन्द गर्न आग्रह गरेको छ।
