नवप्रवर्तन र लक्षित पोषणमा चिनियाँ दुग्ध उद्योगको अन्तर्राष्ट्रिय प्रभाव विस्तार

ड्रागन मिडिया समाचार कक्ष

चीनको दुग्ध उद्योग परम्परागत दूध तथा दुग्धजन्य उत्पादनमा सीमित नरही कार्यात्मक पोषण, विशिष्ट स्वास्थ्य आवश्यकता अनुकूल उत्पादन र अन्तर्राष्ट्रिय अनुसन्धान सहकार्यतर्फ विस्तार भएसँगै विश्व बजारमा यसको नवप्रवर्तन क्षमताले बढ्दो मान्यता पाउन थालेको छ।

स्पेनको बार्सिलोनामा जुन १७ र १८ मा आयोजित १९औँ ग्लोबल डेयरी कङ्ग्रेसमा चिनियाँ कम्पनीका उत्पादनले विश्व दुग्ध नवप्रवर्तन पुरस्कारअन्तर्गत विभिन्न विधामा सफलता प्राप्त गरेका थिए।

यस वर्ष २३ विधामा १७७ प्रविष्टि सहभागी भएको प्रतियोगितामा चीनको यिली समूहले दुई वटा मुख्य पुरस्कार जित्नुका साथै १० वटा फाइनलिस्ट र सात वटा प्रशंसित सम्मान प्राप्त गरेको थियो।

यिली समूहको चाङछिङ लेमन एन्ड ओट पपिङ बिड्स प्रोबायोटिक योगर्टले उत्कृष्ट दही उत्पादनको पुरस्कार जितेको थियो। गोङलाओको हुलुनबुइर स्ट्रेन मिल्क स्किन योगर्ट उत्कृष्ट परम्परागत दुग्ध उत्पादन घोषित भएको थियो।

पुरस्कृत तथा अन्तिम प्रतिस्पर्धामा पुगेका यिलीका उत्पादनमा वयस्क पोषण, तरल दूध, आइसक्रिम, दूधको धुलो, क्रिम र विशेष स्वास्थ्य आवश्यकताका लागि विकास गरिएका दुग्धजन्य उत्पादन समावेश थिए। कम्पनीले लगातार सातौँ वर्ष उक्त अन्तर्राष्ट्रिय प्रतियोगितामा सम्मान प्राप्त गरेको जनाएको छ।

ग्लोबल डेयरी कङ्ग्रेसका अध्यक्ष रिचर्ड हलले परम्परागत दुग्ध उत्पादक राष्ट्रको तुलनामा चीनले अन्तर्राष्ट्रिय बजारमा ढिलो प्रवेश गरे पनि अत्यन्त तीव्र गतिमा ज्ञान र प्रविधि विकास गरेको बताए।

उनले अनुसन्धान, उत्पादन विकास र प्राविधिक नवप्रवर्तनमा गरिएको निरन्तर लगानीले चिनियाँ दुग्ध उद्योगलाई उत्पादनमा आधारित वृद्धिबाट नवप्रवर्तनमा आधारित विकासतर्फ अघि बढाएको उल्लेख गरे।

उद्योग विशेषज्ञहरूका अनुसार विश्वभरका उपभोक्ताले अब सामान्य पोषण मात्र नभई उमेर, जीवनशैली र विशेष स्वास्थ्य आवश्यकताअनुसार तयार गरिएका उत्पादन खोज्न थालेका छन्। यस परिवर्तनले दुग्ध उद्योगलाई स्वाद र गुणस्तरको सुधारभन्दा अघि बढेर लक्षित पोषण समाधान विकास गर्न प्रेरित गरेको छ।

यिली समूहका उपाध्यक्ष इग्नेसियस सेतोले हड्डीको स्वास्थ्य, मांसपेशीको कार्यक्षमता, रोग प्रतिरोधात्मक क्षमता, पाचन प्रणाली र रगतमा ग्लुकोज व्यवस्थापनजस्ता क्षेत्रमा नयाँ उत्पादन विकास भइरहेको बताए।

उनका अनुसार व्यक्तिगत स्वास्थ्यप्रतिको चासो विश्वव्यापी रूपमा बढ्दै जाँदा दुग्ध उत्पादन क्रमशः सूक्ष्म तथा लक्षित पोषणतर्फ रूपान्तरण भइरहेको छ। मानिसको उमेर, शारीरिक अवस्था र स्वास्थ्य आवश्यकताअनुसार अलग पोषण समाधान विकास गर्नु उद्योगको आगामी प्रमुख वृद्धि क्षेत्र बन्ने उनको भनाइ छ।

सेतोले अन्तर्राष्ट्रिय बजार विस्तार गर्दा प्रत्येक देशको खाद्य नियमन, उपभोक्ता रुचि, पोषणसम्बन्धी मान्यता र बजारको विशिष्ट आवश्यकता बुझ्नुपर्ने बताए। एउटै उत्पादन वा रणनीति सबै बजारमा समान रूपमा प्रभावकारी नहुने भएकाले स्थानीयकरणलाई अन्तर्राष्ट्रिय विस्तारको महत्वपूर्ण आधार मानिएको छ।

अनुसन्धान तथा उत्पादन विकासलाई सुदृढ गर्न चिनियाँ दुग्ध कम्पनीहरूले विदेशी विश्वविद्यालय र वैज्ञानिक संस्थासँग सहकार्य विस्तार गरेका छन्। यिलीले एसिया, युरोप र ओसिनियामा नवप्रवर्तन केन्द्र स्थापना गर्नुका साथै बेलायतको क्याम्ब्रिज विश्वविद्यालय, नेदरल्यान्ड्सको वागेनिङ्गेन विश्वविद्यालय तथा अनुसन्धान केन्द्र र न्युजिल्यान्डको लिंकन विश्वविद्यालयसँग सहकार्य गर्दै आएको छ।

चिनियाँ विश्वविद्यालय तथा अनुसन्धान संस्थासँगको साझेदारीसमेत जोडेर कम्पनीहरूले पोषण विज्ञान, दुग्ध प्रशोधन, खाद्य सुरक्षा, उत्पादन प्रविधि र उपभोक्ताको स्वास्थ्य आवश्यकतासम्बन्धी अनुसन्धान अघि बढाइरहेका छन्।

विश्व दुग्ध नवप्रवर्तन पुरस्कारको निर्णायक मण्डलमा उत्पादन, पोषण विज्ञान, प्रविधि, बजार विकास र दुग्ध उद्योगका विभिन्न क्षेत्रका विज्ञ सहभागी थिए। पुरस्कार आयोजकका अनुसार यस वर्षका उत्पादनमा सामान्य पोषणभन्दा अघि बढेर प्रोटिन, रक्तचिनी व्यवस्थापन, विशेष पोषक तत्व र शारीरिक कार्यसम्पादनलाई लक्षित गर्ने प्रवृत्ति स्पष्ट देखिएको छ।

अन्तर्राष्ट्रिय बजारमा प्राप्त पछिल्लो मान्यताले चिनियाँ दुग्ध उद्योग ठूलो परिमाणको उत्पादनमा मात्र नभई अनुसन्धान, लक्षित पोषण, प्रविधि र उपभोक्ताकेन्द्रित नवप्रवर्तनमा पनि आफ्नो उपस्थिति विस्तार गरिरहेको देखाएको छ।