क्यानडालाई ३–० ले हराउँदै मोरक्को विश्वकपको क्वार्टरफाइनलमा
ड्रागन मिडिया समाचार कक्ष
सहआयोजक क्यानडालाई ३–० गोल अन्तरले पराजित गर्दै मोरक्को फिफा विश्वकप २०२६ को क्वार्टरफाइनलमा प्रवेश गरेको छ।
अमेरिकाको ह्युस्टनमा शनिबार भएको अन्तिम १६ को खेलमा अजेदिन उनाहीले दुई र सुफियान राहिमीले एक गोल गर्दै मोरक्कोलाई प्रभावशाली जित दिलाए।
यो सफलतासँगै मोरक्को विश्वकपमा एकभन्दा बढीपटक क्वार्टरफाइनल पुग्ने पहिलो अफ्रिकी राष्ट्र बनेको छ। उसले यसअघि सन २०२२ को विश्वकपमा सेमिफाइनलसम्म पुगेर अफ्रिकी फुटबलकै इतिहासमा नयाँ कीर्तिमान बनाएको थियो।
खेलको पहिलो हाफमा क्यानडाले आक्रामक प्रदर्शन गर्दै मोरक्कोमाथि दबाब सिर्जना गरेको थियो। क्यानडाका खेलाडीले गोलका केही अवसर बनाए पनि मोरक्कोका गोलरक्षक यासिन बोनोले उत्कृष्ट बचाउ गर्दै टोलीलाई खेलमा कायम राखे।
विशेषगरी तानी ओलुवासेयीको खतरनाक प्रहार विफल पार्दै बोनोले सम्भावित गोल टारेका थिए। पहिलो हाफ गोलरहित बराबरीमा सकिएको थियो।
दोस्रो हाफमा मोरक्को फरक लयमा मैदानमा उत्रियो। खेलको ५०औँ मिनेटमा अचरफ हाकिमीको फ्रिकिक पासलाई सदुपयोग गर्दै उनाहीले पेनाल्टी क्षेत्र बाहिरबाट आकर्षक गोल गरे र मोरक्कोलाई १–० को अग्रता दिलाए।
क्यानडाले बराबरी गोलका लागि आक्रमण तीव्र बनाउँदा मोरक्कोले रक्षात्मक संयमसँगै तीव्र प्रत्याक्रमणको रणनीति अपनायो।
खेलको ८२औँ मिनेटमा ब्राहिम डियाजको पासमा उनाहीले व्यक्तिगत दोस्रो गोल गर्दै मोरक्कोको अग्रता दोब्बर बनाए।
इन्जुरी समयको आठौँ मिनेटमा राहिमीले थप गोल गरेपछि मोरक्कोले ३–० को शानदार जित सुनिश्चित गर्यो।
क्यानडाले पहिलो हाफमा प्रभावशाली प्रदर्शन गरे पनि प्राप्त अवसरलाई गोलमा परिणत गर्न सकेन। मोरक्कोले भने दोस्रो हाफमा संयमित खेल, प्रभावकारी प्रत्याक्रमण र उत्कृष्ट गोल क्षमताका आधारमा नतिजा आफ्नो पक्षमा पारेको थियो।
यस जितसँगै मोरक्कोले विश्वकपको नकआउट चरणमा अफ्रिकी राष्ट्रमध्ये आफ्नो प्रभावशाली उपस्थिति थप बलियो बनाएको छ।
पराजयसँगै क्यानडाको घरेलु मैदानमा विश्वकप यात्रासमेत समाप्त भएको छ। प्रतियोगिताका अमेरिका, मेक्सिको र क्यानडामध्ये क्यानडा बाहिरिने पहिलो सहआयोजक टोली बनेको छ।
अब मोरक्कोले सेमिफाइनल प्रवेशका लागि उपाधिको प्रमुख दाबेदार फ्रान्सको सामना गर्नेछ।
फ्रान्सले अन्तिम १६ को अर्को खेलमा पाराग्वेलाई १–० ले पराजित गरेको थियो। किलियन एम्बाप्पेले दोस्रो हाफमा पेनाल्टीमार्फत गरेको गोल फ्रान्सको जितका लागि निर्णायक बनेको थियो।
मोरक्को र फ्रान्सबीचको क्वार्टरफाइनल प्रतिस्पर्धा सन २०२२ को विश्वकप सेमिफाइनलको पुनरावृत्ति हुनेछ। उक्त खेलमा फ्रान्सले मोरक्कोलाई पराजित गरेको थियो।
लगातार दोस्रो विश्वकपमा अन्तिम आठमा पुगेको मोरक्कोले यसपटक फ्रान्सविरुद्ध अघिल्लो पराजयको बदला लिँदै अर्को ऐतिहासिक उपलब्धि हासिल गर्ने लक्ष्य राख्नेछ।
