उच्च अदालत जनकपुरको फछर्यौट प्रगति : दुई वर्ष पुराना मुद्दा शून्यमा झर्यो, लक्ष्यको ९५.२४ प्रतिशत हासिल
ड्रागन मिडिया समाचार कक्ष
जनकपुरधामको न्यायिक क्षेत्रले यस आर्थिक वर्षमा उल्लेखनीय प्रगति गरेको छ। उच्च अदालत जनकपुरले सार्वजनिक गरेको तथ्यांकअनुसार, दुई वर्षभन्दा पुराना मुद्दाहरूको संख्या शून्यमा झरेको छ, जसले अदालतको मुद्दा व्यवस्थापनको प्रभावकारिता देखाएको छ।
अदालतको विवरणअनुसार, १८ महिनादेखि दुई वर्षभित्रका बाँकी मुद्दा मात्र १३ वटा रहेका छन् भने एक वर्षदेखि डेढ वर्षभित्रका मुद्दा ३८७ वटा छन्। चालु आर्थिक वर्ष २०८२/८३ को असार १९ गतेसम्ममा उच्च अदालतले कुल ४ हजार ३३० वटा मुद्दा फछर्यौट गरेको हो। यो कुल संख्यामा ४ हजार १६१ वटा नयाँ दर्ता मुद्दा र २ हजार २६७ वटा अघिल्लो वर्षबाट जिम्मेवारी सरी आएका मुद्दाहरू समावेश छन्।
अदालतका रजिष्ट्रार विश्वजंग सिजापतिका अनुसार, कुल मुद्दामध्ये २ हजार ९८ वटा मुद्दा अझै फछर्यौट हुन बाँकी छ। जिम्मेवारी सरी आएका मध्ये २ हजार ४७ वटा फछर्यौट भइसकेका छन्, जबकि २२० वटा बाँकी छन्। त्यसैगरी, नयाँ दर्ता मुद्दामध्ये २ हजार २८३ वटा फछर्यौट भएका छन् भने १ हजार ८७८ वटा बाँकी रहेका छन्।
यस आर्थिक वर्षका लागि अदालतले ४ हजार ५४६ वटा मुद्दा फछर्यौट गर्ने लक्ष्य राखेको थियो। असार १९ गतेसम्म ४ हजार ३३० वटा मुद्दा फछर्यौट भएकोले, लक्ष्यको ९५.२४ प्रतिशत हासिल भइसकेको छ।
न्यायाधीशहरूको व्यक्तिगत योगदानको कुरा गर्दा, कायम मुकायम मुख्य न्यायाधीश टेकनारायण कुँवर सबैभन्दा अगाडि छन्। उनको इजलाशले १ हजार ३१० वटा मुद्दा फछर्यौट गरेको छ। यसैगरी, न्यायाधीश टीकाराम आचार्यले १ हजार ११५, जगदिश घिमिरेले ९४६, राजुराम सिलवालले ८९६, कृष्णप्रसाद सुवेदीले ८४६, कैलासप्रसाद सुवेदीले ८२६, फुर्पा तामाङले ७२३, मुरारीबाबु श्रेष्ठले ६८४, कमलप्रसाद पोखरेलले ६५९ र श्यामकुमार भट्टराईले ५७८ मुद्दा फछर्यौट गरेका छन्।
उच्च अदालत जनकपुरको यो समग्र प्रगतिले न्यायिक प्रक्रियाको दक्षता, पारदर्शिता र मुद्दाको सन्तुलित व्यवस्थापनलाई देखाउँछ। पुराना मुद्दाको चाप शून्यमा झर्नुले अदालतले समयबद्ध न्याय प्रदान गर्नतर्फ सकारात्मक कदम चालेको प्रमाणित गरेको छ।
