रोनाल्डोले गरे पुष्टि, २०२६ नै अन्तिम विश्वकप
ड्रागन मिडिया समाचार कक्ष
पोर्चुगलका कप्तान तथा भेट्रान फरवार्ड क्रिस्टियानो रोनाल्डोले फिफा विश्वकप २०२६ आफ्नो खेल जीवनको अन्तिम विश्वकप हुने पुष्टि गरेका छन्।
अमेरिकाको टेक्ससस्थित आर्लिङटनमा सोमबार स्पेनविरुद्ध हुने अन्तिम १६ को बहुप्रतीक्षित खेलअघि आइतबार आयोजित पत्रकार सम्मेलनमा बोल्दै ४१ वर्षीय रोनाल्डोले विश्वकप यात्राको अन्तिम अध्यायमा आफूले प्रत्येक क्षणको आनन्द लिन चाहेको बताए।
“म आफ्नो अन्तिम विश्वकपको पूर्ण आनन्द लिन चाहन्छु,” रोनाल्डोले भने, “आशा गरौँ, भोलिको खेल मेरो अन्तिम खेल हुने छैन।”
सन् २००६ मा पहिलोपटक विश्वकप खेलेका रोनाल्डोले त्यसपछि २०१०, २०१४, २०१८, २०२२ र २०२६ गरी लगातार छैटौँ विश्वकपमा सहभागिता जनाएका छन्। जारी प्रतियोगिताको समूह चरणमा उज्वेकिस्तानविरुद्ध दुई गोल गर्दै उनी छवटा फरक विश्वकपमा गोल गर्ने पहिलो पुरुष खेलाडी बनेका थिए।
रोनाल्डोले जारी विश्वकपमा तीन गोल गरिसकेका छन्। उज्वेकिस्तानविरुद्ध दुई गोल गरेका उनले अन्तिम ३२ मा क्रोएसियाविरुद्ध पेनाल्टीमार्फत बराबरी गोल गरेका थिए। त्यो विश्वकपको नकआउट चरणमा उनको पहिलो गोल थियो। पोर्चुगलले क्रोएसियालाई २–१ ले पराजित गर्दै अन्तिम १६ मा स्थान बनाएको थियो।
अन्तर्राष्ट्रिय फुटबलबाट संन्यास लिने समय नजिकिएको सङ्केत गर्दै रोनाल्डोले नतिजा जस्तो आए पनि आफूले कुनै पछुतोबिना मैदान छाड्ने बताए।
“त्यो दिन पनि आउनेछ,” उनले भने, “तर भोलि जे भए पनि म शतप्रतिशत होइन, एक हजार प्रतिशत सफा मन लिएर बाहिरिनेछु। मैले फुटबललाई आफ्नो सबैथोक दिएको छु। मलाई अब केही आवश्यक छैन। मेरो जीवन राम्रो छ। म केवल फुटबलप्रतिको लगावका कारण खेलिरहेको छु।”
उनले आफ्नो उमेर र भूमिकामा आएको परिवर्तनलाई स्वीकार गरे पनि गोल गर्ने क्षमता अझै कायम रहेको बताए। “म पहिलेको जस्तो खेलाडी नरहेको कुरा बुझ्छु, तर एउटा कुरा परिवर्तन भएको छैन। म अझै गोल गर्न सक्छु,” उनको भनाइ थियो।
तीन गोलसहित जारी प्रतियोगितामा आफ्नो प्रदर्शन सन्तोषजनक रहेको उल्लेख गर्दै रोनाल्डोले ठट्टाको शैलीमा भने, “म त्यति खराब पनि गरिरहेको छैन, होइन र?”
पोर्चुगललाई सन् २०१६ को युरोपेली च्याम्पियनसिप र दुईपटक युरोपेली नेसन्स लिगको उपाधि दिलाउन महत्त्वपूर्ण भूमिका निर्वाह गरेका रोनाल्डोले आफ्नो महानता प्रमाणित गर्न विश्वकप जित्नैपर्ने दबाब नरहेको पनि स्पष्ट पारे।
“मलाई कुनै कुराको अभाव छैन। ईश्वर मप्रति निकै उदार रहनुभयो,” उनले भने, “विश्वकप जित्दैमा म बढी क्रिस्टियानो हुने वा नजित्दैमा कम हुने होइन। हामी सबै उपाधि जित्न चाहन्छौँ, तर अन्ततः एउटा देशले मात्र विश्वकप जित्छ।”
आगामी सन् २०३० को विश्वकप पोर्चुगल, स्पेन र मोरक्कोले संयुक्त रूपमा आयोजना गर्दैछन्। तर रोनाल्डोले आफ्नो घरेलु भूमिसमेत आयोजक रहने उक्त प्रतियोगितासम्म खेलाडीका रूपमा निरन्तरता नदिने स्पष्ट पारेका छन्।
पत्रकार सम्मेलनमा उनले स्पेनका १८ वर्षीय उदीयमान खेलाडी लामिन यामलको प्रतिभाको प्रशंसा गरे। यद्यपि पोर्चुगलले स्पेनलाई कुनै एक खेलाडीमा केन्द्रित टोलीका रूपमा नभई सामूहिक रूपमा बलियो प्रतिद्वन्द्वीका रूपमा हेरेको उनले बताए।
पोर्चुगल र स्पेनबीचको अन्तिम १६ को खेल सोमबार टेक्ससको आर्लिङटनस्थित डलास स्टेडियममा हुनेछ। विजेता टोलीले विश्वकपको क्वार्टरफाइनलमा स्थान बनाउनेछ।
