गणेश नेपालीको उपचार खर्च सरकारले व्यहोर्ने, थप उपचारका लागि दिल्ली लैजाने तयारी
ड्रागन मिडिया समाचार कक्ष
त्रिपुरेश्वरस्थित राहदानी विभाग अगाडि भएको घटनामा परी गम्भीर रूपमा घाइते भएका गणेश नेपालीको सम्पूर्ण उपचार खर्च नेपाल सरकारले व्यहोर्ने भएको छ।
हाल वीर अस्पतालमा उपचाररत नेपालीको थप तथा विशिष्टीकृत उपचारका लागि भारतको नयाँ दिल्लीस्थित अखिल भारतीय आयुर्विज्ञान संस्थान, एम्स, लैजाने तयारी अघि बढाइएको छ। चिकित्सकहरूको परामर्श र बिरामीको स्वास्थ्य अवस्थालाई ध्यानमा राख्दै उनलाई तत्काल भारत लैजान आवश्यक प्राविधिक तथा व्यवस्थापकीय तयारी तीव्र पारिएको हो।
बिरामीको स्वास्थ्य अवस्था बुझ्न र उपचार प्रक्रियालाई थप प्रभावकारी बनाउन गृहमन्त्री सुधन गुरुङ र प्रधानमन्त्रीको सचिवालयका सदस्यहरू वीर अस्पताल पुगेका छन्। उनीहरूले उपचारमा संलग्न चिकित्सकहरूसँग नेपालीको स्वास्थ्य अवस्था, भइरहेको उपचार, थप उपचारको आवश्यकता र भारत लैजाने सम्भावित प्रक्रियाबारे जानकारी लिएका छन्।
चिकित्सकहरूसँगको परामर्शपछि सम्बन्धित निकायलाई बिरामीलाई तत्काल भारत लैजान आवश्यक पर्ने सम्पूर्ण प्राविधिक, चिकित्सकीय तथा व्यवस्थापकीय तयारी गर्न निर्देशन दिइएको छ। सरकारले उपचार प्रक्रियामा कुनै कमी हुन नदिन आवश्यक सहजीकरण गर्ने जनाएको छ।
प्रधानमन्त्री वालेन्द्र शाहको पहलमा गणेश नेपालीलाई थप उपचारका लागि दिल्ली लैजाने प्रक्रिया अघि बढाइएको हो। प्रधानमन्त्रीको सचिवालयले बिरामीको उपचार, परिवारसँगको समन्वय र अस्पताल प्रशासनसँगको आवश्यक व्यवस्थापनमा सक्रियता देखाएको बताइएको छ।
गृहमन्त्री गुरुङले वीर अस्पतालमा पुगेर उपचारमा संलग्न चिकित्सकहरूबाट अवस्थाबारे जानकारी लिँदै उपचारमा आवश्यक पर्ने सहयोगमा सरकारका तर्फबाट कुनै कमी नहुने बताएका छन्। उनले बिरामीको शीघ्र स्वास्थ्यलाभको कामना गर्दै सम्बन्धित निकायलाई संवेदनशीलताका साथ काम गर्न आग्रह गरेका छन्।
घटनापछि गणेश नेपाली वीर अस्पतालमा उपचाररत छन्। उनको थप उपचार स्वदेशमा सम्भव हुने वा भारत लैजानुपर्ने भन्ने विषयमा चिकित्सकहरूको रायका आधारमा निर्णय अघि बढाइएको हो।
सरकारले उपचार खर्च व्यहोर्ने निर्णय गरेसँगै परिवारलाई उपचार खर्चको तत्कालीन दबाब कम हुने अपेक्षा गरिएको छ। घटनाबारे सम्बन्धित निकायले आवश्यक अनुसन्धान र थप प्रक्रिया अघि बढाइरहेको बताइएको छ।
