धैर्यको परीक्षा नलिन रास्वपा सांसद पुकार बमको साङ्केतिक चेतावनी
ड्रागन मिडिया समाचार कक्ष
राष्ट्रिय स्वतन्त्र पार्टी, रास्वपाका सांसद पुकार बमले सामाजिक सञ्जालमार्फत साङ्केतिक चेतावनी दिएका छन्।
बिहीबार सामाजिक सञ्जालमा स्टाटस लेख्दै बमले अनावश्यक चलखेल नगर्न, आफूलाई कमजोर नठान्न र धैर्यको परीक्षा नलिन चेतावनी दिएका हुन्। उनले आफ्नो अभिव्यक्तिमा “शान्त ज्वालामुखी” को रूपक प्रयोग गर्दै धैर्यलाई कमजोरीका रूपमा नबुझ्न आग्रह गरेका छन्।
बमले आफ्नो सामाजिक तथा राजनीतिक यात्राको पनि स्मरण गरेका छन्। उनले सन् २००४ देखि शुरु भएको २२ वर्ष लामो सामाजिक तथा राजनीतिक संघर्षको प्रसंग उल्लेख गर्दै आफूले धेरै उतारचढाव पार गरिसकेको बताएका छन्।
उनले आफ्नो राजनीतिक र सामाजिक जीवनमा हार्न, सकिन वा गुमाउन बाँकी केही नरहेको आशयसहित आफूलाई सत्याग्रहीका रूपमा प्रस्तुत गरेका छन्। बमले इतिहास बुझ्न केही समय लाग्ने भन्दै त्यसतर्फ समय र शक्ति खर्च गर्न उचित हुने संकेत गरेका छन्।
सांसद बमले उक्त स्टाटस कसलाई लक्षित गरेर लेखेका हुन् भन्ने स्पष्ट गरेका छैनन्। उनले आफ्नो अभिव्यक्तिमा कुनै व्यक्ति, समूह वा दलको नाम उल्लेख गरेका छैनन्।
पछिल्लो समय रास्वपाभित्रको आन्तरिक बहस, नयाँ राजनीतिक समीकरण र प्रधानमन्त्री वालेन्द्र शाहसँग जोडिएका राजनीतिक चर्चाबीच बमको यो स्टाटसलाई चासोका साथ हेरिएको छ। तर बमले आफ्नो अभिव्यक्तिको प्रत्यक्ष राजनीतिक सन्दर्भ खुलाएका छैनन्।
सामाजिक सञ्जालमा सार्वजनिक गरिएको उनको साङ्केतिक अभिव्यक्तिले रास्वपाभित्र र बाहिर दुवैतर्फ राजनीतिक अर्थ लगाइरहेको देखिन्छ। यद्यपि औपचारिक रूपमा बम वा रास्वपाका तर्फबाट यसबारे थप व्याख्या सार्वजनिक भएको छैन।
रास्वपाका सांसदका रूपमा बमले विगतदेखि वैकल्पिक राजनीति, नागरिक अभियान र सामाजिक मुद्दासँग आफूलाई जोड्दै आएका छन्। उनको पछिल्लो अभिव्यक्ति पनि व्यक्तिगत संघर्ष, राजनीतिक असन्तुष्टि र साङ्केतिक चेतावनीको मिश्रित शैलीमा आएको देखिन्छ।
