अमेरिकी आक्रमणपछि इरानको प्रत्याक्रमण, तीन देशका सैन्य आधारलाई निशाना बनाएको दाबी
ड्रागन मिडिया समाचार कक्ष
इरानले आफ्नो दक्षिणी तटीय क्षेत्रमा अमेरिकाले गरेको हवाई आक्रमणको जवाफमा बहराइन, कुवेत र जोर्डनमा रहेका अमेरिकी सैन्य आधार तथा पूर्वाधारलाई लक्षित गरी मिसाइल र ड्रोन आक्रमण गरेको दाबी गरेको छ।
होर्मुज जलमार्गलाई लिएर अमेरिका र इरानबीच सैन्य तनाव बढिरहेका बेला इरानी सेना र इस्लामिक रिभोलुसनरी गार्ड कोरले क्षेत्रीय अमेरिकी सैन्य उपस्थितिमाथि प्रत्याक्रमण जारी रहेको जनाएका हुन्।
इरानी सरकारी समाचार संस्था आइआरएनएका अनुसार इरानी सेनाले जारी गरेको विज्ञप्तिमा कुवेतस्थित अमेरिकी सैन्य आधारहरूमा ड्रोन आक्रमण गरिएको उल्लेख छ।
विज्ञप्तिअनुसार कुवेतस्थित अली अल–सालेम र अहमद अल–जाबेर वायुसेना आधार, त्यहाँ रहेका मिसाइल प्रतिरक्षा प्रणाली, बंकर तथा अन्य सैन्य पूर्वाधारलाई निशाना बनाइएको छ।
इरानी पक्षले ती आक्रमणलाई अमेरिकाले इरानका तटीय सैन्य क्षेत्रमाथि गरेको हवाई कारबाहीको जवाफका रूपमा प्रस्तुत गरेको छ।
इस्लामिक रिभोलुसनरी गार्ड कोरले आफ्नो जवाफी सैन्य कारबाहीको दोस्रो चरणअन्तर्गत बहराइनस्थित शेख इसा एयरबेसका विभिन्न सैन्य संरचनालाई पनि निशाना बनाएको दाबी गरेको छ।
आईआरजीसीका अनुसार उसको एरोस्पेस फोर्सले हेलिकोप्टर मर्मत केन्द्र, अमेरिकी नौसेनाको पी–८ गस्ती विमान राखिएको ह्यांगर तथा अमेरिकी सैन्य ड्रोनको कमाण्ड एन्ड कन्ट्रोल केन्द्रमा आक्रमण गरेको हो।
आईआरजीसीले जोर्डनस्थित प्रिन्स हसन एयरबेसमा मिसाइल र ड्रोन आक्रमण गरिएको पनि जनाएको छ।
इरानी पक्षका अनुसार उक्त कारबाहीपछि एयरबेस परिसरमा रहेका केही इन्धन भण्डारण केन्द्र र गोलाबारुद भण्डारण संरचनामा आगलागी भएको छ।
यद्यपि, इरानी सेना र आईआरजीसीले सार्वजनिक गरेका लक्ष्य तथा क्षतिको विवरण स्वतन्त्र रूपमा पुष्टि हुन सकेको छैन।
बहराइन, कुवेत, जोर्डन वा अमेरिकी अधिकारीहरूले इरानी पक्षका सबै दाबी पुष्टि गर्ने विस्तृत विवरण तत्काल सार्वजनिक गरेका छैनन्। आक्रमणको वास्तविक प्रभाव, प्रयोग गरिएका मिसाइल तथा ड्रोनको संख्या र सैन्य संरचनामा पुगेको क्षतिबारे स्पष्ट जानकारी आउन बाँकी छ।
इरानी सेनाले अमेरिकाले आफ्ना सैन्य क्षेत्र, नागरिक पूर्वाधार तथा सर्वसाधारणमाथि बारम्बार आक्रमण गरेको आरोप लगाएको छ।
तेहरानले अमेरिकी कारबाहीलाई संयुक्त राष्ट्रसंघको बडापत्रका आधारभूत सिद्धान्त, इरानको सार्वभौमिकता र भौगोलिक अखण्डताको उल्लङ्घनका रूपमा व्याख्या गरेको छ।
इरानी सेनाको विज्ञप्तिमा देशको सार्वभौमिकता, स्वतन्त्रता, भौगोलिक अखण्डता र जनताको सुरक्षाका लागि आवश्यक परे सम्पूर्ण सैन्य क्षमता प्रयोग गरिने चेतावनी दिइएको छ।
अमेरिका र इरानबीच जारी आक्रमण तथा प्रत्याक्रमणको श्रृंखलाले होर्मुज जलमार्ग, खाडी क्षेत्रका सैन्य आधार र क्षेत्रीय सुरक्षामाथि जोखिम बढाएको छ।
तनाव थप चर्किएमा ऊर्जा आपूर्ति, अन्तर्राष्ट्रिय समुद्री आवागमन र खाडी क्षेत्रको समग्र स्थिरतामा व्यापक प्रभाव पर्न सक्ने चिन्ता बढेको छ।
