दिगो समुद्री विकासका लागि इन्डोनेसियामा आसियान नीलो अर्थतन्त्र मञ्च
ड्रागन मिडिया समाचार कक्ष
इन्डोनेसियाले दिगो समुद्री विकासका उत्कृष्ट अभ्यास आदानप्रदान गर्ने उद्देश्यसहित पूर्वी जाभा प्रान्तको बान्युवाङ्गी जिल्लामा अन्तर्राष्ट्रिय नीलो अर्थतन्त्र मञ्च आयोजना गर्ने भएको छ।
‘आसियान–आईडी ब्लु फोरम’ नाम दिइएको दुईदिने कार्यक्रम शुक्रबार र शनिबार अर्थात जुलाई १७ र १८ मा आयोजना हुनेछ। मञ्चमा आसियान सदस्य राष्ट्र तथा साझेदार देशका प्रतिनिधिले समुद्र र तटीय श्रोतको दिगो उपयोग, आर्थिक विकास तथा वातावरणीय संरक्षणका विषयमा अनुभव आदानप्रदान गर्नेछन्।
इन्डोनेसियाको विदेश मन्त्रालय तथा समुद्री मामिला र मत्स्य मन्त्रालयले न्युजिल्यान्डको विदेश मामिला तथा व्यापार मन्त्रालयसँगको सहकार्यमा मञ्च आयोजना गर्न लागेका हुन्।
इन्डोनेसियाको विदेश मन्त्रालय अन्तर्गत आसियान आर्थिक सहयोग निर्देशक अध्यान्ती सरदानारिनी विराजुदाका अनुसार समुद्री संरक्षणलाई मत्स्यपालन, पर्यटन, लघु उद्यम तथा सामुदायिक सशक्तीकरणसँग सफलतापूर्वक जोडेको कारण बान्युवाङ्गीलाई मञ्चको आयोजना स्थलका रूपमा छनोट गरिएको हो।
उनले बान्युवाङ्गीले समुद्री तथा तटीय श्रोतको संरक्षणसँगै स्थानीय आर्थिक गतिविधि र समुदायको जीविकोपार्जनलाई प्रवर्द्धन गरेको बताउँदै यो विकास नमुना सहभागी देशसँग साझा गर्न इन्डोनेसिया इच्छुक रहेको उल्लेख गरेकी छन्।
मञ्चमा आसियान सदस्य राष्ट्रका साथै पूर्वी एसिया शिखर सम्मेलनमा सहभागी देश र प्रशान्त टापु मञ्चका सदस्य राष्ट्रका प्रतिनिधिको सहभागिता रहने अपेक्षा गरिएको छ।
छलफल मुख्यतः नीलो अर्थतन्त्रको क्षेत्रीय सम्भावना, दिगो मत्स्य व्यवस्थापन, समुद्री जैविक विविधताको संरक्षण, तटीय समुदायको आर्थिक सशक्तीकरण तथा समुद्री श्रोत व्यवस्थापनमा अन्तरदेशीय सहकार्य विस्तार गर्ने विषयमा केन्द्रित हुनेछ।
नीलो अर्थतन्त्रले समुद्र र तटीय क्षेत्रका श्रोतलाई आर्थिक वृद्धि तथा रोजगारी सिर्जनाका लागि उपयोग गर्दा समुद्री पारिस्थितिक प्रणाली, जैविक विविधता र स्थानीय समुदायको दीर्घकालीन हित संरक्षण गर्नुपर्ने अवधारणालाई प्राथमिकता दिन्छ।
इन्डोनेसियाले बान्युवाङ्गी मञ्चमार्फत आसियान, पूर्वी एसिया र प्रशान्त क्षेत्रका देशबीच व्यावहारिक अनुभव आदानप्रदान गर्दै दिगो समुद्री अर्थतन्त्र विकासका लागि क्षेत्रीय सहकार्यलाई थप बलियो बनाउने लक्ष्य लिएको छ।
