वाङ हुनिङद्वारा विश्वभरका प्रवासी चिनियाँ सङ्घसंस्थाका प्रतिनिधिसँग भेट

ड्रागन मिडिया समाचार कक्ष

चीनका शीर्ष राजनीतिक सल्लाहकार वाङ हुनिङले बेइजिङमा आयोजित विदेशस्थित चिनियाँ सङ्घसंस्थाहरूको मैत्रीसम्बन्धी ११औँ सम्मेलनमा सहभागी प्रतिनिधिसँग भेट गरेका छन्। सम्मेलन सोमबार शुरु भएको हो।

चिनियाँ कम्युनिस्ट पार्टी केन्द्रीय समितिको राजनीतिक ब्युरो स्थायी समितिका सदस्य तथा चिनियाँ जनराजनीतिक परामर्शदात्री सम्मेलनको राष्ट्रिय समितिका अध्यक्ष वाङले प्रतिनिधिहरूलाई स्वागत गर्दै चिनियाँ कम्युनिस्ट पार्टी केन्द्रीय समितिका तर्फबाट विश्वभर रहेका प्रवासी चिनियाँ समुदायप्रति हार्दिक शुभकामना व्यक्त गरे।

सम्मेलनको उद्घाटन समारोहलाई सम्बोधन गर्दै चिनियाँ कम्युनिस्ट पार्टी केन्द्रीय समितिको राजनीतिक ब्युरोका सदस्य तथा केन्द्रीय संयुक्त मोर्चा कार्य विभागका प्रमुख ली कानच्येले प्रवासी चिनियाँहरू चिनियाँ राष्ट्रका महत्वपूर्ण सदस्य भएको बताए।

उनले प्रवासी चिनियाँ समुदायलाई चिनियाँ आधुनिकीकरण अघि बढाउने महत्वपूर्ण सहभागी तथा चीन र बाँकी विश्वबीच सम्बन्ध विस्तार गर्ने प्रभावकारी सेतुका रूपमा चित्रण गरे।

लीले प्रवासी चिनियाँहरूलाई राष्ट्रिय पुनरुत्थानको महान उद्देश्यमा सक्रिय योगदान गर्न, विश्वको शान्तिपूर्ण विकासलाई प्रवर्द्धन गर्न तथा विदेशस्थित चिनियाँ सङ्घसंस्थाबीच एकता र सहकार्य थप सुदृढ बनाउन आह्वान गरे।

उनले विभिन्न देशमा रहेका चिनियाँ समुदायले आपसी सम्पर्क, सहयोग र समझदारी विस्तार गर्दै चीन र विश्वबीचको आर्थिक, सामाजिक तथा सांस्कृतिक आदानप्रदानमा सकारात्मक भूमिका निर्वाह गर्न सक्ने बताए।

यो सम्मेलन विश्वका प्रमुख प्रवासी चिनियाँ सङ्घसंस्थाका प्रतिनिधिबीच संवाद, अनुभव आदानप्रदान र सम्पर्क सञ्जाल विस्तार गर्ने महत्वपूर्ण मञ्चका रूपमा स्थापित भएको छ।

यस वर्षको सम्मेलनमा १४० देश तथा क्षेत्रका प्रवासी चिनियाँ सङ्घसंस्थाका ४०० भन्दा बढी प्रमुख तथा प्रतिनिधिको सहभागिता रहेको छ।