युरोपमा आणविक हतियार विस्तारले प्रत्यक्ष टकरावको जोखिम बढाउने रुसको चेतावनी
ड्रागन मिडिया समाचार कक्ष
जेनेभास्थित संयुक्त राष्ट्र कार्यालयका लागि रुसी स्थायी प्रतिनिधि गेन्नाडी गातिलोभले युरोपेली मुलुकहरूमा आणविक हतियार तैनाथ गर्ने सम्भावना बढ्दै जाँदा आणविक शक्तिहरूबीच प्रत्यक्ष टकरावको जोखिमसमेत बढ्ने चेतावनी दिएका छन्।
जेनेभामा शुक्रबार रुसी समाचारपत्र ‘इज्भेस्तिया’को प्रश्नको जवाफ दिँदै गातिलोभले लिथुआनियाको संसदले आणविक हतियार तैनाथीमाथिको प्रतिबन्ध हटाउने प्रक्रिया अघि बढाएको तथा इस्टोनिया र पोल्यान्डमा पनि यस्तै माग उठिरहेको विषयमा रुस गम्भीर रहेको बताए।
उनका अनुसार फिनल्यान्ड र पोल्यान्ड यसअघि नै उत्तर एट्लान्टिक सन्धि संगठन (नेटो) का संयुक्त आणविक अभियानमा परम्परागत सैन्य शक्ति र सहयोगी संरचनामार्फत वास्तविक रूपमा सहभागी भइरहेका छन्। ती मुलुकहरू अब अमेरिकी मात्र नभई फ्रान्सेली आणविक हतियारसमेत आफ्नो भूभागमा ढुवानी वा तैनाथ गर्न सक्ने क्षमता हासिल गर्ने दिशामा अघि बढिरहेको उनको दावी छ।
गातिलोभले युरोप रुससँगको तनाव थप चर्काउने बाटोमा अघि बढिरहेको र ‘विस्तारित आणविक प्रतिरोध’ सम्बन्धी योजनामा सहभागी देशहरूको दायरा बढाइरहेको बताए। नेटोले आफूलाई लामो समयदेखि ‘आणविक गठबन्धन’का रूपमा प्रस्तुत गर्दै आएको र युरोपले रुसलाई ‘रणनीतिक पराजय’ दिलाउने लक्ष्य नत्यागेको उनको भनाइ थियो।
लिथुआनिया, इस्टोनिया वा अन्य युरोपेली मुलुक आणविक हतियारसम्बन्धी व्यवस्थामा जोडिन खोज्नु वर्तमान राजनीतिक अवस्थाका कारण आश्चर्यजनक नभएको उनले बताए। तर औपचारिक रूपमा गैर–आणविक मानिएका राष्ट्रमा आणविक हतियार तैनाथ हुँदा उनीहरूको सुरक्षा बलियो नहुने र उल्टै जोखिम बढ्ने रुसी प्रतिनिधिको भनाइ छ।
गातिलोभले रुसले जेनेभास्थित निःशस्त्रीकरण सम्मेलनसहित सम्बन्धित बहुपक्षीय मञ्चमा यो विषय नियमित रूपमा उठाउँदै आएको जानकारी दिए। नेटो सदस्यहरूको आणविक गतिविधिले विश्वव्यापी आणविक अप्रसार व्यवस्थामा अपूरणीय क्षति पुर्याउने र रणनीतिक जोखिम उल्लेखनीय रूपमा बढाउने रुसको धारणा रहेको उनले बताए।
आणविक हतियारसम्बन्धी संरचना र तैनाथीको दायरा विस्तार हुँदै गएमा आणविक शक्तिहरूबीच प्रत्यक्ष भिडन्तको सम्भावना बढ्न सक्ने भन्दै गातिलोभले यस्तो अवस्था आउन नदिन अन्तर्राष्ट्रिय समुदायले तत्काल जिम्मेवार भूमिका निर्वाह गर्नुपर्नेमा जोड दिए।
