पाकिस्तान–चीनबीच औषधि क्षेत्रमा ४४ करोड डलरका सम्झौता
ड्रागन मिडिया समाचार कक्ष
पाकिस्तान र चीनका औषधि कम्पनीबीच ४४ करोड अमेरिकी डलर बराबरका विभिन्न सम्झौता भएका छन्। इस्लामाबादमा शुक्रबार शुरु भएको दुईदिने पाकिस्तान–चीन औषधि, स्वास्थ्य सेवा तथा जैविक प्रविधिसम्बन्धी लगानी सम्मेलनमा ती सम्झौता गरिएको हो।
पाकिस्तानी प्रधानमन्त्री शहबाज शरिफले व्यावसायिक सम्झौताले चीन–पाकिस्तान आर्थिक करिडोर—सीपेक २.० अन्तर्गत औद्योगिक सहकार्यलाई व्यावहारिक परियोजनामा रूपान्तरण गर्ने बताएका छन्। उनका अनुसार सहकार्यले औषधि, खोप र जीवनरक्षक स्वास्थ्य सामग्रीको संयुक्त उत्पादनसँगै अनुसन्धान तथा विकासका नयाँ अवसर खोल्नेछ।
सम्मेलनमा करिब तीन सय चिनियाँ प्रतिनिधिसहित झन्डै पाँच सय स्वदेशी तथा विदेशी प्रतिनिधि सहभागी भएका छन्। दुई सयभन्दा बढी पाकिस्तानी कम्पनीले चिनियाँ लगानीकर्ता, उत्पादक, प्रविधि प्रदायक र उद्योग प्रतिनिधिसँग प्रत्यक्ष व्यावसायिक छलफल गरिरहेका छन्।
छलफलका छ प्राथमिक क्षेत्रमा औषधिका सक्रिय कच्चा पदार्थ, जैविक प्रविधि तथा खोप, चिकित्सा उपकरण, जेनेरिक औषधि तथा इन्जेक्सन, चिकित्सकीय परीक्षण तथा अनुसन्धान र जडीबुटी तथा परम्परागत चिनियाँ औषधि समावेश छन्।
पाकिस्तानले आफ्नो औषधि उद्योगलाई आवश्यक करिब ९० प्रतिशत कच्चा पदार्थ विदेशबाट आयात गर्दै आएको छ। चिनियाँ लगानी, प्रविधि र उत्पादन अनुभवले घरेलु उत्पादन क्षमता बढाउन, आयात निर्भरता घटाउन र आपूर्ति श्रृंखला बलियो बनाउन सहयोग गर्ने पाकिस्तानी अधिकारीहरूको विश्वास छ।
पाकिस्तानका लागि चिनियाँ लगानी केवल पूँजीको विषय होइन। स्थानीय रूपमा कच्चा पदार्थ, खोप र चिकित्सा उपकरण उत्पादन गर्न सके देशको स्वास्थ्य सुरक्षा बलियो हुनुका साथै रोजगारी, प्रविधि हस्तान्तरण र औषधि निर्यात विस्तारको आधार निर्माण हुन सक्छ।
पाकिस्तानका लागि चिनियाँ राजदूत च्याङ चाइतोङले दुई देशका कम्पनीबीच लगानी तथा औद्योगिक सहकार्य विस्तार गर्न चिनियाँ दूतावासले सहजीकरण जारी राख्ने बताए। उनले चिनियाँ कम्पनीका लागि स्थिर सुरक्षा वातावरण र अनुकूल व्यावसायिक अवस्था सुनिश्चित हुने अपेक्षासमेत व्यक्त गरे।
सम्मेलनमा संयुक्त लगानी, प्रविधि साझेदारी र दीर्घकालीन औद्योगिक सहकार्यका लागि कम्पनीहरूबीच प्रत्यक्ष बैठक भइरहेको छ। सम्झौता प्रभावकारी कार्यान्वयनमा गए पाकिस्तानलाई क्षेत्रीय औषधि उत्पादन तथा निर्यात केन्द्रका रूपमा विकास गर्ने सीपेक २.० को लक्ष्यमा महत्त्वपूर्ण योगदान पुग्न सक्छ।
